A los mios amigos, América Gonzalo Gelot y Paco Pantín, de Corao. Y a toos los vecinos de los pueblos encuestaos que sofitaron el mio trabayu.



Abamia: la parroquia d’Abamia alcuéntrase na fastera más central de les once que formen el conceyu de Cangues d’Onís. Asítiase nel valle d’El Güeña, ríu que cuerre d’este a oeste, dexando un tarrén envallegáuo de vegues amplies nes sos orielles onde s’avéren tamién dellos pueblos. Les riegues, regueros, y ríos que s’amiésten con El Güeña son: al norte, El Ríu Chicu; Al sur, la riega L’ Agüeñaz, La Riega Xiro, el ríu Deva, y El Regueru Cezures, que ye’l llinderu natural d’esta parroquia cola parroquia de La Riera. Al este, El Regueru Umandi que cuerre per Intriagu, rayando ‘l tarrén de la so oriella drecha cola parroquia de Mestes de Con. Al oeste, La Riega Cabielles y El Regueru d’Onao separten dambos la parroquia d’Abamia de la de Cangues.

Los pueblos que s’alcuentren na parroquia son: Abamia, Celoriu, Corao (agora cabeza de la parroquia), Corao Castiellu, Coraín, Corigos, Cuetu Abamia, Cuetu Aleos, La Estrada, Intriagu, Isongu, Parolu, Pedrugada, Perlleces, Teleña, Sobrecueva, Sotu Cangues. Abamia llenda al norte cola parroquia de Llabra y la de Cangues. Al sur coles parroquies de La Riera y Cuadonga. Al este coles parroquies de Grazanes y Mestes de Con. Y al oeste cola parroquia de Cangues. Les llendes de la parroquia d’Abamia, feches nel mapa, asemeyen coraes metanes el conceyu de Cangues d’Onís.

Pol so allugamientu ta perbién comunicada. Pel norte, tando averada a la fastera meridional de les xerres litorales orientales d’Asturies, enllaza cola costa del conceyu de Llanes. Asina, diendo pela carretera de Corao a Llabra y per Ixena, llégase a El Valle de San Xurde, nes orielles d’El Aguamía, en Nueva de Llanes. Pel sur ta la carretera a Cuadonga qu’empobina tamién pal Parque Nacional Picos d’Europa. Y d’oeste a este, la carretera de Cangues d’Onís Panes crucia la parroquia. Hai ramales de carreterines pa tolos pueblos. La ilesia parroquial asítiase nel pueblu de Corao dende 1915. Festéxase Nuestra Señora de l’Asunción en Corao (el 15 d’agostu), anque’l nome eclesiásticu de l’antigua ilesia parroquial, asitiada n’Abamia y agora en desusu, ye Santa Olaya d’Abamia.



Dellos datos llingüísticos de la fala oriental

- Aspiración de la f- llatina: h. Como en h.uente, h.iyu, h.abla, H.abariega, La H.orcada.

A vegaes conserváse la ñ inicial como en ñaz, Los Ñozalones, Ñavaríu. Y tamien n’interior de pallabra alcontramos fresñu, comuñal. Nel pueblu de Perlleces consérvase un dichu qu’un informante sintió dicir a so güela: El que ñon diga, ñon, ñada, ñabos, ñabaya, a mio casa que ñon vaya.

Los femeninos faen el plural en -es: Les H.uentines, Les Piperes. Nel femenin singular apaez la vocal final -e: La Cueste, La Puerte, La Peñe.

Piérdese la -d- nos masculinos finaos en –áu,-eu,-íu . El Castañéu, El Barréu, l’ aguáu, comíu, partíu.

El pronome personal suxetu de tercera persona singular ‘elli’, ta mui vivu na fala de la xente de la parroquia: ‘ayeri vieno elli’.

Empléguense siempre na fala, los pronomes personales átonos de complementu direutu ya indireutu de 1ª y 2ª p. Singular mi,ti, frente a me,te: ‘diómi la mazana’, ‘ ¡pegóti bien!’.

Nel indefiníu del verbu trayer, empléguense les formes con vocal tónica –/é/: trexi.



Abamia: 1. Pueblu de la parroquia. 2. Cuetu en forma de llomba, enforma altu, dende onde s’avista tou el valle d’ El Ríu Güeña. Asítiase pa la fastera a manzorga del ríu, al sureste de Corao y a 1km.del pueblu. Llenda al norte con Corao, al sur con la Peñe Isongu, al este con Teleña y La Estrada, al oeste con Corigos. El camín más antiguu pa xubir ye’l qu’entama n’ El Castañéu de Corao diendo per El Puente Abamia y El Canaloriu. Hai tamién un ramal nuevu de carretera que xube dende La Escuela. Nel tarrén hai eríes, mates y munches riegues. Ellí ta allugada La Iglesia d’Abamia y el barriu que llamen El Cuetu Abamia. La llomba del cuetu allárgase pal este y nómase Aleos. 3. Nome de la parroquia (v. entamu).

Abareros, Los ( ~ Los Pandales): Tarrén na ería Santu Mederu. Lláman-y agora Los Pandales. N’ Isongu.

Ablaneda la H.uente, L’: Ablanéu na mesma cañada del pueblu, con camín iguáu en pista. En Coraín.

Ablaneda, L’: 1.Barriu de Coraín pa lo fonderu del pueblu,con una vivienda. 2. Monte a ablanos. N’Aleos.

Ablanedina, L’: Sitiu en Coraín.

Ablanu de Cuenyu L’: Tarrén xubiendo pa la ería de Santu Mederu per Cuenyu. N’Isongu.

Abolitos, Los: Tarren a h.aces2 na ería Llendespina. N’Isongu.

Abolitu, l’: Prau na ería Llendespina. N’Isongu

Acebal, L’(~L ’Acebal de Pandisiertos): 1. Llugar con cuadres, xubiendo pa Pedrugada, al que tamién llamen-y L'Acebal de Pandisiertos. 2. Praos a pastu zarraos con muriu, de tarrén ente llano y pindiuo onde hai una cabaña. En Pedrugada.

Aguañaz, L’ (~ L’Agüeñaz~Güeñaz): 1.Riega que naz n’El Puertu de la Montaña de Cuadonga. Baxa rayando con Isongu y cuerre per Corigos y en Corao amiéstase con El Güeña n’El Puente Abamia. Corigos. 2. Llugar en L’Aguañaz que yera’l llavaderu del sanmartín d’Isongu y Corao antaño. 3. Surdimientu d’agua que sal per un cuevu y faise riega na oriella’l camín. D’ellí traen l’agua pal pueblu de Corao. En Corigos.

Agüera, L’: 1. Ería na oriella drecha d’El Güeña. N’Intriagu. 2. Cachu tarrén na ería del mesmu nome.

Aguileros, Los: Praos del llau d’El Aguileru. N’ Isongu.

Aguileru, L’: Prau con casa nun coterín engoláu, pa escontra Llendespina. Ta penrriba de Campu la Vara. N’Isongu.

Alambráu, L’: Prau tirando a cuadráu con daqué llanada, chicu3 y arrimáu4. Ta pal monte Sulreborial. En Coraín.

Albardín, L’: Llugar en La Vega d’ Intriagu. El tarrén ye de mala traza.

Aleos, (~ Cuetu Aleos): 1.Barriu que ta penriba d’El Cuetu Abamia, na so fastera este. Tien ería, invernales y cuatro viviendes. Ta asitiáu nun cuetu arboláu. Hai un camín que va per El Somenal y Rialeos pa dir a Teleña y la entrada dende Corao ye xubiendo per Abamia. La xente falando diz, Aleos, pa estremalu del otru barriu del llugar nomáu El Cuetu. 2. Ería a praos. H.aces a sema y castañeos. Ta diendo per Rialeos a Teleña, na fastera pa escontra La Estrada. D’ellí baxa un ramal tamién pa La Vega d’Aleos. Llenda colos praos de La H.orcada. En Cuetu Aleos. V. El Cuetu.

Alh.oz, L’: H.aza a travayantíu na ería Llendespina. N’Isongu.

Andoreyu, (~ Andoreñu): Ivernal ente Orientes y La Canal. En Teleña.

Apertadoriu, L’: Cuadres y praos pendabaxu Priena. En Teleña.

Arbeyu, L’: 1. Prau de tarrén mui bien echáu5, y con daqué arboláu, nes cercanies de La Peñe Isongu. Isongu. 2. Fonte que naz n’esti prau pente llábanes. D’ella, sal un regatu de mal tiempu que súmese dempués pel camín. Tien daqué p’abebentar el ganáu.

Arbolinos, Los: Caminu encaxonáu y escuru que sal a Paraes. En La Peñe Isongu.

Arena, L’: Llugar en La Vega H.ondos, ta pa escontra El Güeña. Corao.

Arenalón, L’: Curvona degolada que fai El Güeña ente Intriagu y La Estrada. Ta xusto dempués de cruciar El Puente Intriagu, a la manzorga de l’entamu’l pueblu.

Areneru, L’: ye un areneru de onde saquen arena pa facer obres. En La Cueste Intriagu

Argayaes, Les: Llugar en La Cueste la Granda onde hai dos praos que llenden pel oeste con El Güeña. En Corao. Tán nel estremu d’El Vao de Sulacantera nes cercaníes d’El Vao de Llambréu. En Corao.

Armuñíu: Dos praos mal figuraos6. Unu arredondiáu y l’otru allargáu. Tarázalos El Ríu Chicu pel mediu. En Coraín.

Aroces: Ería a siega, ye pergrande y allargáse pa escontra Sobrecueva. Coraín.

Aspra, L’: 1.Caminu empozáu y pedregalosu que baxa per Cambarosu dende Isongu a Combes, yá na parroquia de La Riera. N’Isongu. 2. Praos pindios asitiaos nes orielles d’esti camín.

Balsa, La: Barriu d’unes diez viviendes nes orielles de la carretera a Cuadonga. Ta enantes d’El Bosque. En Sotu Cangues.

Baragaña, La: Prau a siega. En La Ería d’Abaxu de Perlleces.

Barreda, La: 1. Pumarada mui bon y prau con tarrén de tierra arroxao y barrizo. Ta na oriella del camín que xube a Corao Castiellu. 2. Camín agora igáu en carreterina pa dir a Corao Castiellu. 3. Sitiu en Corao dientro’l prau Tarazón. 3. Llugar al llau de La Teyera onde sacaben el barru. En Sotu Cangues.

Barréu, El: 1. Barriu no cabero del pueblu, a la drecha. N’Intriagu. 2. Prau arrimáu y rigüetu7. En Coraín. 3. Praos en Teleña.

Barrial, El: Prau onde ta’l sumidoriu de La Riega’l Somenal. En Cuetu Aleos.

Barriosu, El: Pumarada na ería Santu Mederu. N’Isongu.

Barriu Abaxu, El: 1.Barriu en Perlleces. 2. Barriu en Coraín. Dambos tán a l’entamu’l pueblu.

Baxu la Vega H.ondos: Llugar en La Vega de H.ondos. Ta pal oeste enantes de San Nicolás ensin llegar a l’entamu la carretera de Corao Castiellu. En Corao.

Befal, El, (~ Beh.al): 1. Llugar que ta pembaxo de Corao na xuntura d’El Ríu Chicu y Güeña, onde hai finques y viviendes. 2. Nome que-y dan a La Güerta Pina por tar nesi sitiu, y que ta conseñáu nes escritures vieyes como “Beh.al”.

Berezal, El: Una cantera pa sacar piedres pa obres. Ta nun cuetu enllenu de berezos qu’ agora ta yá mui menguáu pel usu de la cantera. Dende ellí avistáse la carretera a Cuadonga. Llenda col camín l’Aspra que baxa hasta ella. N’Isongu.

Berrugosu, El: Peñascu arboláu penriba’l barriu La Balsa. En Sotu Cangues.

Bolao: Tarrén pembaxo Santu Mederu. Llenda pel sur cola riega L’Agüañaz. Ta pa escontra Corigos. Tamién apaez conseñáu nes escritures antigues como “Bolaz” y “Volao”. N’Isongu

Bolera, La: 1. Barriu en Corao. 2. Sitiu y barriru con dos cases no caberu de Corao Castiellu, onde diz qu’había una bolera. 3. Barriu d’Isongu. Hai una casa con un fornu a pan de piedra na corrada, un horru, una cuadra y un prau zarráu sobre sí con muriu. Ta na cruz de caminos qu’estremen los barrios a l’entamu’l pueblu. 4. Barriu n’Intriagu de cuatro cases. 5. Barriu en Teleña al principiar el pueblu. 6. Barriu en Sotu Cangues; hai cinco cases y un horru y ta nes cercanies de la Capilla de Santa Lucía. 7. Barriu en Celoriu a l’entamu’l pueblu. Hai dos horros, seis viviendes y tres cuadres. Antañu había bolera. 7. Barriu en Perlleces, a l’entamu’l pueblu, onde taba la fonte antigua y el llavaderu.
Bolerona, La: Llugar metanes les cases del barriu La Bolera en Corao. Ellí yera onde taba la bolera’l pueblu, antañu.

Borboyu, El: Parax de praos y h.aces bien echaes. Ta na ería Aroces, metíu nun valle afondáu, xunto a Les Cavaes. En Coraín.

Boscón, El: Llugar arboláu en La Cueste la Granda. En Corao.

Bosque, El: 1. Llugar en La Cueste la Granda. En Corao. 1. Barriu de Sotu Cangues, asitiáu nes orielles de la carretera de Cuadonga. Pel sur fina nel llinderu natural que fai El Regueru Cezures, y que ta yá rayando cola parroquia de La Riera.

Bosquexu, El: Barriu n’ Intriagu.

Bosquín, El: Castañéu y arboláu de bidules. Ta onde’l depósitu l’agua del pueblu d’Isongu.

Bravial, El (~ El Fabrial): Sitiu pindiu en La Viña. Dalgunos nómenlu El Fabrial. En Corao.

Burrayos: Praos na ería Santu Mederu. N’Isongu.

Bustacu, El: Cuadres nun prau zarráu sobre sí, de munchos amos. N’Intriagu.

Cabaña Miyar, La: Invernal asitiáu ente Orientes y Los Ñozalones. Ta nes lladeres de Priena. Teleña.

Cabezu de Grema, El: Cuetu arrredondiáu, ribayosu, con camperes y arboláu no cimeru. Ta penriba de Teleña pa escontra El Cuetu Aleos. Asítiase entrambos.

Cabezu, El: 1. Prau penriba de Marillabra. En Cuetu Aleos. Diz que-y llamen asina porque tien dello llanu y dempués xube p’arriba finando nuna morra8, asemeyando un cabezu. 2. Prau arrimáu pa escontra La Peñe Isongu onde hai una cuadra, nuna campera d’Omedina. N’Isongu.

Cácabu, El: Dellos praos. Dalgunos pindios, y d’otros camperes llanes. Asítianse a la drecha baxando pela carretera de Teleña, dempués de La Ería d’Abaxu. Tien una caleyina pa baxar a El Molín de Perico. Teleña.

Cadaval, El: Llugar onde hai una cuadra. En La Ería d’Abaxu de Parolu.

Caidizos, Los: Llugar a pastu comunal. En La Peñe Isongu.

Caleya la Viña, La: Ta a la manzorga d’El Camín Real onde s’arrexúnten El Cepéu d’Arriba, n’Aleos, y El Cepéu d’Abaxu, en Teleña. Allégase hasta El Pozalán.

Caleya Rales, La: Camín pa dir a El Puertu de la Montaña de Cuadonga. Va dende El Cuetu Aleos a Teleña, pasa per La H.orcada, La Canal y sal a Güesera, ya en La Montaña de Cuadonga. Dende 1987, pel centenariu de Fassinelli, conozse tamién como “La Ruta Frassinelli”. Teleña.

Caleya Xerruca, La: Camín d’ilesia qu’empobinaba p’Abamia y pa El Cimenteriu d’Abamia. Entamaba en Corigos enllazando con El Camín de Pitu, onde La Xerruca y diba hasta el camín El Canaloriu. Antañu yera l’únicu pasu qu’había pa la xente de la parroquia que diba dende Sotu Cangues, pasando per Isongu, p’Abamia.Yera tamién un cachu de El Camín Real que diba pa Teleña.Corigos.

Caleya, La: 1. Barriu de cases, que ta nes orielles de lo qu’antañu yera la caleya del pueblu d’Intriagu. Agora la caleya ta iguada en carretera y pasa pel mediu’ l pueblu. 2. Campera en Perlleces.

Caleyín de la Viña, El: Caminín cuestu pa dir pa les finques rigüetes de La Viña. En Corao.

Caleyín, El: Prau pindiu en La Ería d’Abaxu de Perlleces. 2. Camín que diba dende El Tuxín al barriu La Bolera. En Perlleces.

Caleyina de Peñapeñil, La: Caleya de Coaro Castiellu que baxa per Peñapeñil a La Estrada.

Caleyón de Castañeda, El: Caleyón metanes el barriu Castañeda qu’allégase hasta La Cueste y El Regañáu. N’Isongu.

Caleyón de la H.uana, El: Caleyón qu’enantes yera mui malu, cuestu y envallegáu y agora ta iguáu en pista y ameyoráu. Va dende El Valle a l’encruciyada de caleyes de Les H.uentines d’Abaxu. N’Isongu.

Caleyón de La Llongar, El: Camín solombríu con arboláu nes orielles y tarrén con daqué matoxu. Xunta Les H.uentines d’Abaxu con Cimavilla. Na oriella manzorga del caleyón hai una cuadra. N’Isongu.

Caleyón del Cuadru, El: Caleya antigua pa dir pal invernal de La Canal. Agora ta iguada en pista. En Teleña.

Caleyón del Rozu, El: Camín d’ilesia que diba p’Abamia dende Perlleces. Cruciaba per La Prida a Sobrecueva y d’ellí empobinaba pa El Canaloriu en Corao. Entama en La H.uente Rozada. Perlleces.

Caleyón del Ventaniellu, El: Caleyón empozáu y escuru pa dir d’Omedina a Pelafonso. Pel este sal a La Peñe Isongu penriba d’Abamia.

Caleyón l’Aguáu, El: Camín pindiu, agora iguáu en pista, que va dende’l barriu Cantez a Cimavilla. N’Isongu.

Caleyón, El: 1. Camín pa escontra El Güeña onde tán la fonte y el llavaderu del pueblu d’Intriagu. 2. Barriu asitiáu nesi mesmu camín. 3. Camín principal de Perlleces pa dir penriba’l pueblu..

Caleyona, La: Camín pa dir pa El Barréu. En Corao.

Caleyu Mariña, El: Prau a herba mui rigüetu en La Ería d’Abaxu de Perlleces.

Calle l’agua, La (~ Calle Frassinelli): Calle nes cercanies del calce d’El Ríu Chicu. Llámen-y tamién Calle Frassinelli por tar ellí asitiada la casa na que vivió Frassinelli. En Corao.

Calle, La: Barriu metanes el pueblu de Teleña.

Calvín, El: Prau a pastu na ería Santu Mederu, diendo p’El Camín del Valle, nel sitiu conocíu como Los Calvinos. N’Isongu.

Calvinín, El: Tarrén nel sitiu de Los Calvinos. Ta na ería Santu Mederu. N’Isongu.

Calvinos, Los: Llugar onde tán asitiaos los praos El Calvín y El Calvinín. N’Isongu.

Calzada del Barréu, La: Camín antigu pal barriu d’El Barréu. Antañu taba empedráu con llástres y agora ta iguáu con aglomeráu9. N’Intriagu.

Cambarosu: Cuetu con castañeu onde había una bona casa agora en ruines. Allúgase na fastera suroeste d’Isongu y allargándose hasta la parroquia de la Riera, llega hasta les ruines d’un antiguu conventu que llamen L’Abadía asitiáu na so lladera. Hai un camín que baxa dende Isongu pa La Riera. Dellos informantes dicen que’l significáu del nome ye ‘cama d’osu’ y que dalgunos tamién y llamen Campoloso. Isongu.

Cambre: Barriu onde ta El Palaciu de Cambre, na oriella drecha d’El Deva. En Sotu Cangues.

Camín Cimavilla, El: Camín que ta metanes el barriu del mesmu nome y qu’empobina pa Campu la Vara. N’Isongu.

Camín de Campu la Vara, El: Camín de carru que va metanes el barriu del mesmu nome. N’Isongu.

Camín de Cuenyu, El: Camín pa dir a les h.aces y praos de Cuenyu. Ye rigüetu con arboláu nes orielles. Entama a la mitada de la carretera que xube pa Isongu, na so oriella manzorga, y allega a la ería Santu Mederu. N’Isongu.

Camín de l’Aguileru, El: Camín que llenda per un llau con Campu la Vara, y pel otru col llugar d’El Aguileru. N’Isongu.

Camín de la Barreda, El: Camín que xube dende Corao pal pueblu de Corao Castiellu. Agora iguáu en carretera. Corao Castiellu.

Camín de la Bolera, El: Camín pa dir al barriu La Bolera y pa La Conquista. En Corao Castiellu.

Camín de los Pastores, El: Canga que sal a La Canal pa dir a El Puertu de la Montaña de Cuadonga, nes lladeres de Priena. En Teleña.

Camín de los Pozos, El: Camín con llamargues por aciu de les riegues que cuerren pellí. Va pal castañéu del mesmu nome. Ta en Corao Castiellu pa escontra La Estrada.

Camín de Pedrugada, El: Camín que va dende La Estrada a Pedrugada. Agora ta iguáu en carretera.

Camín del Campu, El: Camín antigu empedráu y que sal del barriu del mesmu nome. Enllaza cola pista que xube per Cincuerna. En Teleña.

Camín del Pitu, El: Ramal de camín que sal d’El Canaloriu y pasa per Corigos, allegándose a l’entamu de la carretera que xube pa Isongu, nes cercanies deTornamila. Corao.

Camín del Pueblu, El: Camín principal de Celoriu, con ramales pa tolos barrios, y que sal a Sordenes.

Camín del Puertu, El: Cualesquiera delos caminos que, dende los pueblu de la parroquia, empobinen pa les mayaes a pastu comunal d’El Puertu de la Montaña de Cuadonga. Hai caminos principales; Otros que comuniquen con caminos secundarios; Siendes; Pasos d’oveyes y vaques. Tán fechos dende mui antigu pa llevar el ganáu pa les vegues, onde hai otros ramales pa dir ente elles.

Camín del Riberu, El: Camín iguáu de carretera que sal a L'Acebal y a La Estrada. Entama nel barriu La Bolera en Corao Castiellu. Nel mesmu camín hai un bebederu y llavaderu de branu, de cuando nun había agua nes cases. Agora ta too ello desdexao.

Camín del Susucu, El: Camín asitiáu nel barriu Los Campos y que baxa pa La Presa d‘El Molín. Antañu, díbase per él a llavar a El Güeña. En Corao.

Camín del Valle, El: Camín que va dende El Valle pa Santu Mederu. N’Isongu.

Camín p’Abamia, El: Camín d’ilesia pa dir dende Celoriu a Abamia. Diba pela oriella drecha del Güeña arimáu a La Vega H.ondos y allegaba a El Canaloriu.

Camín pa Cangues, El: Camín de Celoriu que va pela oriella drecha d’El Güeña hasta Cangues d’Onís.

Camín pa Parolu, El: Entama en Sobrecueva onde Sularriba y El Praón pa dir a Parolu.

Camín Real, El: 1.Camín antiguu que taba fechu de bones llábanes y qu’agora ta enterráu. Yera pa dir dende La Torre La Xura al Campu la Xura. En Sotu Cangues. 2. Cachos del camín principal d’antañu, en Teleña y Corao.

Camín Sulapeñe, El: Camín antiguu. Entamaba nel barriu Los Campos y diba dende Corao, pembaxo La Conquista, a Corao Castiellu. Yera’l camín pel que diben a escuela los rapaces de tola parroquia a Corao Castiellu, enantes de facer l’escuela en Corao. Corao.
Camín Sulavilla, El: Camín pa los praos de Sulavilla. En Corao Castiellu.

Camperu, El: Barriu con dos cases y bona fonte con agua abondo. Tien un llavaderu perantiguu que s’iguó hai poco. N’Intriagu.

Campos, Los: 1. Barriu asitiáu nel camín principal de Corao onde hai delles viviendes con horru. Antañu pásaba-y la carretera de Cangues d’Onís a Panes pel mediu, pero nun va muncho fízose una nueva y pasóse tres del pueblu. 2. Tarrén en La Viña. Corao. 3. Llugar en Corao Castiellu onde llega El Camín Sulapeñe que xube de Corao.

Campu la Cueste: Cruz de caminos con un cachu prau cuestu. D’ellí, sal un atayu pa dir a la Cruz. En Teleña.

Campu la Vara: Barriu asitiáu nun coteru y que tien un camín cuestu de carru pel mediu pel que cuerre una riega de mal tiempu. Hai finques y tres viviendes, cuntando la d’El Aguileru, que ye tamién del mesmu barriu.

Campu la Xura, El: Campera xunto a La Torre la Xura. En Sotu Cangues. Ye un tarrén patente, asitiáu a la drecha d’El Puentón de la Mecedura. Antaño yera too un castañéu y hai un sieglu nun habia viviendes. Cunta un informante: “Bastiábase’l castañéu pela nueche y tronzábenlu de día pa facer les cases y yá va pa ochenta años que s’asitió equí ‘l barriu Cauvilla”. Amás, los vecinos del barriu sintieron dicir que nesti llugar había un dolmen agora desapaecíu y tamién una mesa de piedra, onde se sentaben los escribanos, xueces y l’estáu llanu pa elexir los Rexidores y Xusticieros del conceyu. A los escoyíos pesllábenlos en La Torre la Xura y salíen d’ella per El Camín Real, qu’empobinaba pa El Campu la Xura, onde xuraben el cargu y coyíen les vares de mandu. Esto ta conseñao tamién en dellos llibros. Nel mesmu tarrén, agora, allúgase “El Camping Covadonga”, a orielles d’El Deva. Un informante diz que “nesti campu yera onde entamó a festexase Cuadonga, muncho enantes de facese la fiesta nel santuariu ”.
Campu, El: Barriu onde hai tres viviendes. En Teleña.

Canal, La: Ye un invernal con cuadres p’abellugar el ganáu. Ta daqué separáu del pueblu de Teleña y vase pel Caleyón del Cuadru. Teleña.

Canaloriu, El: Camín asitiáu nuna encruciyada onde s’arrexuntaben toos los caminos d’ilesia de la parroquia qu’empobinaben p’Abamia: El Robléu, El Camín del Pitu, La Caleya Xerruca, El Caleyón del Rozu, etc. Antaño, yera nesi llugar onde aniciaba ‘l camín más antiguu pa dir a L’Ilesia d’Abamia y a El Cimenteriu d’Abamia. El camín entamaba n’El Puente Abamia que ta penriba d’El Castañéu de Corao. Agora‘l llugar ta desdexáu porque fízose una carretera nueva pa xubir per otru llau. Una informante cunta: “El camín llámase asina porque tevo munchu tiempu nél el podredoriu del Cuélebre en canal, que dempués d’afogase n’El Güeña, baxo El Puente Abamia, cuando diba escorriendo al cura d’Abamia por pega-y un tiru, sacárenlu p’alli”. Dalgunu diz Cannanoriu. En Corao.

Cantales, Los: Cuetón pembaxo d’ El Cimenteriu d’Abamia, pa escontra la Estrada, no caberu La Cueste la Granda. Agora ta menguáu por aciu d’ una cantera antigua. En Cuetu Abamia.

Cantera, La: 1. Barriu d’una casona en Corao Castiellu. Tien l’escudu del apellíu Labra col caballeru baxo’l castiellu corando a un Cuélebre con un espetón. Ye una bona posesión y tien casa pal caseru. 2. Viescu en La Peñe Isongu. Ye un tarrén chicu que ta dientro la mata Les Duernes. 3. Llugar onde antañu había una cantera de la que sacaben arenisca pa facer obres. En Teleña 4. Llugar al llau del tarrén La Teyera d’onde sacaben la piedra caliar pa facer lladriyos, teyes y cal. Agora desapaecida. En Sotu Cangues. 5. Castañéu en Cuetu Aleos.

Cantez, ( ~ Canté): Barriu de tres viviendes apetiguñaes, pal ramal drechu del pueblu d’Isongu.

Cantu, El: Llugar na ería La Viña. Llamáben-y antaño La Piedrona, porque había ellí una peñasca desapaecida agora. Esi ye´l nome que ta conseñáu nes escritures vieyes. En Corao

Canzadiella: Barriu penriba’l pueblu, ta no cabero d’Intriagu.

Cañadina, La: Escobiu envallegáu y escuru p’arimar el ganáu a les camperes de La Peñe Isongu. N’Isongu

Capilla de la Encarnación, La: Capiella d’El Palaciu de Cambre. Hai un añu que la desiguaron treslladándola desfecha al restorán Villa María, en Cangues de Onís, pa iguala ellí. En Sotu Cangues.

Capilla de la Soledá, La: Ta asitiada nun arboláu xusto tres d’ El Palaciu Parolu na güerta que lu arrodia. Ye posesión de los mesmos amos d’El Palaciu. Diz que ye la más grande d’ente les capielles de la parroquia. Tien un portón de maera n’arcu pergrande na entrada.

Capilla de La Visitación, La: Yera la capiella del Palaciu de Teleña. Agora ta desapaecida y ficieron una vivienda nella. Los santos yeren San Antoniu, La Purísima y Nuestra Señora y baxáronlos pa la ilesia de Corao con retablu y too los que son amos d’El Palaciu güei.

Capilla de los Santinos de los Remedios, La, ( ~ La Capilla la Puerte): Capiella en camín d’El Pozalán. En Teleña. Ye una capiellina chica que ta dientro la posesión La Puerte y ye d’unos amos. Llámen-y tamién Capilla la Puerte. Un informante cunta que “ye la más vieya de les capielles de la parroquia, de va polo menos ochocientos años”. El santu festéxase el dos de xunetu. Cola Virxen de los Remedios tán tamién San Roque y San Antón.

Capilla de San Andrés, La: Ver Capilla de Santa Lucia.

Capilla de San Antón, La: Capiella en Corao Castiellu. Nel pórticu fízose l’escuela del pueblu y hai que de pasar pel mediu l’escuela pa entrar nella. El pueblu compró’ l santu a escote, dempués de La Guerra Civil, na que l’imaxe desapaeciera. Nun se festexa. Antañu yera tamién conocida como “Santo Angel de la Guarda”, acordies colo que ta conseñáo en dellos llibros. Fundóse nel sieglu XVII.

Capilla de San Antoniu, La: Capiella de los amos de la Casona de Soto Labra. En Corao Castiellu. Agora ta n’abertal y medio desiguada. Entá conservénse delles pintures pelos murios de dientro. Cunten qu’el santu fendiéronlu na Guerra Civil.

Capilla de San José, La: Capiella en Perlleces. Hai sepultures de xente que traxeron de Madrid. Festéxase l’ochu d’agostu.

Capilla de San Nicolás, La: Capiella desapaecida nel aniciu d’esti sieglu. Asitiábase nel llugar onde agora ta La Casa’l Médicu, en Corao. Una informante: “Alcuérdome de que nella taben delles imáxenes de madera con traces de tener sío soldaos de la batalla de Cuadonga”. Y cunten tamién los vecinos del pueblu que, cuantayá, allugóse nes cercanies de la capiella un conventu monxos, que yeren unos abusones colos diezmos que pidíen a los llabriegos del llugar. Entós, la xente encabritóse pol abusu, y una nueche entraron nel conventu y coráronlos a toos.Y piensen que d’ehí pue venir el nome de Corao.

Capilla de Santa Ana, La: N’Intriagu. Arródiala un prau zarráu sobre sí. Llenda con un castañéu y dellos praos a pastu col mesmu nome.

Capilla de Santa Lucía, La (~ La Capilla de San Andrés): Capiella en Sotu Cangues nel barriu San Andrés, asitiada nes cercanies de La Casona Ye tamién conocía por La Capilla San Andrés por tar esti santu nella. Antaño foi propiedá de la Casa de Soto y de La Casona de los González Cutre y ye tamién de les más antigües de la parroquia. El pueblu festexa Santa Lucía ‘l seis de xunetu.

Capilla de Santa Rosa de Viterbo, La: Capiella qu’ antaño taba n’El Prau Santa Rosa, onde tamién s’alcontrába El Palación de Corao, desapaecíu hai tiempu. Esta capiella foi treslladada dafechu a El Palaciu de Llabra nun va munchos años.

Capilla de Santu Mederu, La: Capiella asitiada na fastera este d’Isongu, na ería Santu Mederu. Dende ellí, avístense Abamia y Corigos cuasi en llinea reuta. Y pala fastera norte vense Corao, Corao Castiellu, Coraín, Sobrecueva, Parolu, y La Cueste Perlleces Ye de fechura popular con porticu amirando pal sur. Dientro hai un retablu barrocu y delles pintures. El santu festéxase’l tres de marzu y foi nun tiempu la fiesta más importante de la parroquia.

Capilla la Puerte, La: Ver Capilla de los Santinos de los Remedios.

Capilla les Ánimes, La: Capiella en La Estrada. Ta na oriella izquierda de la carretera Cangues d’Onís a Panes, onde agora tamién hai una casa al par. Ye como una cuevina que ta contra turria na que malamente entra una persona de pie polo chica que ye. Tien un teyáu y una puertina n’arcu na entrada. Al paecer, fízola un mayordomu del Conde de la Vega del Seya que yera de Cangues. Cunta una informante: “Un día diba ‘l mayordomu a caballu pa cobrar les rentes del Conde y al pasar per esi llugar, llantóse-y metanes el caminu un cuélebre torgándo-y el pasu. El caballu remontábase y taramingábalu enforma, po el Cuélebre, un lu dexaba siguir de denguna manera. Entós, el mayordomu, enllenu llercia, ufiertó facer ellí mesmu una capiellina pa les Ánimes si’l bichu desapaecía nel intre. Y asina foi. Dende entós, la xente que pasaba per ellí entamó a char perres na capiellina pa espantar al cuélebre. Dempués, daquién recoyía les perres pal mayordomu y la so familia hasta nun va munchu”.

Capilla Santa Eugenia, La: Capiella en Sobrecueva. Ta ente la ería y la mata El Pandal, penriba de Coraín. Dende ellí avistáse perbien Abamia, Isongu, Corao y Corao Castiellu. Antaño había tres santos, la Virxe de los Remedios, San Antoniu, y Santa Eugenia, que desapaecieron na Guerra Civil. Agora hai una imáxe de Santa Olaya. Nesi llugar alcontróse una lápida vadiniense, de Terentius a la so h.iya Cania, acordies colo que ta conseñáu en dellos llibros. Festéxase en febreru. Ye polo menos del sieglu XII, anque iguóse nel sieglu XVIII. Tien fechura popular con pórticu amirando pal sur y un allargamientu d’un muriu en vertical nel llau norte que fai de campanariu.

Carrera, La: Tarrén en La Vega H.ondos. En Corao.

Carriles, Los: Praos que tán apegaos al monte Otura. Llenden cola carretera del pueblu pela drecha y a la manzorga rayen con La Ería d’Abaxu. En Teleña.

Carrilón, El: Camín no cabero’l pueblu de Celoriu pa dir a Perlleces. Ye malísimu, peñasqueru y empozáu y cuerren per él riegues de mal tiempu faciendo llamargues.

Carrilones, Los: Caleyes que cueyen el nome xenéricu de los ramales que daben pasu pa dir d’un barriu a otrru y pente les finques. Salíen toes d’una encruciyada que les separtaba. N’Isongu.

Carrizal, El: Prau con riega pel mediu y fonte del mesmu nome. Baxa de Sobrecueva. Ta apegáu a El Travesáu. En Coraín.

Casa Ali: Barriu d’una vivienda daqué separtada. Ta nun cuetu penriba’l Valle. Ye una posesión col nome del ama. Tien horru cuadra y caminu pa dir pala casa. N’Isongu.

Casa Costán: Casa de vivir y dellos praos ente cuestos y mediu cuestos. En Teleña.

Casa Cuervo, La: Casona blasonada. Ta na oriella drecha de la carretera del pueblu de Corao. Tien corredor colos escudos de les armes de Cangas y Teleña. Conozse col nome del apellíu de los amos, que lo son tamién de la finca La Conquista, La Casa la Peñe, y d’ El Palciu de Teleña.

Casa de Piedrallacia, La: Casa de vivir con daqué arboláu que l’arrodia. Ta asitiada na oriella de La Caleyina de Peñapeñil que baxa de Corao Castiellu a L’Estrada.

Casa del Capitán, La: Casa onde viviá un capitán lexionariu, ta allugada en Tresnoceda. Corao Castiellu.

Casa Frassinelli, La: Casa que lleva esti nome dende’l sieglu pasáu porque D. Roberto Frassinelli, d’orixe italo-alemán, conocíu tamién pel llamatu de “L’ Alemán de Corao”, vivió ellí dende la mitada del sieglu XIX hasta que morrió, tando mesmamente sepultáu en La Ilesia d’Abamia. El so apellíu dió nomes a dellos llugares na parroquia. Yera un investigador y anticuariu qu’ al paecer vieno a Corao, atraíu pela industria de los perconocios reloxeros d’esti pueblu na Europa d’aquel tiempu, (Basilio Sobrecueva y Miyar). Y como alcontrara na parroquia munches coses pa investigar quedóse pa siempre. La casa quemó y sólu s’iguó la metá, polo que la xente fala d’ella como “ la casa quemada”. Pal oeste vense unos murios con un portón n’arcu que tien traces de ser un torraxón mui antiguu. Antaño, la casona foi de la familia col apellíu Cangas. En Corao.
Casa la Peñe, La: Casona allugada adientro la finca La Conquista y zarrada sobre sí con muriu. Ye una casona mui antigua que tenía l’escudu coles armes del apellíu de los Teleña. L’escudu alcuéntrase güei na casa de los sos amos en Corao. Ye de fechura cuadrada con portón d’entrada n’arcu, ventanes chiques y cuadraes arrodiaes de llábanes. Tien horru, cuadres y caballerices. Na corrada había un texu antigüísimu que valtaron nun va munchos años y pue vese entovía el muriu que lu arrodiaba antañu. En Corao Castiellu.

Casa Nueva, La: Barriu d’una vivienda, con cuadres, bar y garaxe. Ta a l’entamu’l pueblu de Corao. Anantes taba ellí la bolera antigua del pueblu.

Casa’l Medicu, La: casa asitiada nel tarrén de la desapaecida Capilla de San Nicolás. Fízose pa vivienda del médicu y va tiempu que yá nun ta n’usu. Agora ta iguada pa fechos culturales del pueblu. En Corao.

Casería de Parolu, La: Ta pembaxo d’El Palaciu de Parolu.

Caseríu, El: Barriu en Teleña.

Caserón, El: Casona que ta fecha un hotel y allugada nel barriu d’abaxu d’El Bosque. Ta cara a La Cueste Torió. En Sotu Cangues.

Casina, La: Barriu d’una casina de piedra con finca. Ta penriba El Praín. En Celoriu.

Casona de los González-Cutre, La: Casona asitiada nel barriu San Andrés de Sotu Cangues. Ta nes cercanies de La Capilla San Andrés y de Santa Lucía, que foi posesión de la mesma casa nun tiempu. Los amos nel aniciu al paecer yeren “Caballeros H.iyosdalgo”. Dempués foi de los González-Cutre. L’aspeutu de la fachada ye de torre medieval y pelos llaos tien fechura de palaciu.

Casona de Soto Labra, La: Casona coles armes d’estos dos apellíos. Nel escudu del apellíu Labra10 apaez un caballeru baxo un castiellu trespasando d’un espetonazu’l gargüelu d’un Cuélebre. Cunten qu’el bichu apaecióse-y al amu, y que lu mató asina. Tres la casa hai una bona güerta con tarrén parceláu, y dalgún camienta que tien traces de tener sío daqué cimenteriu. Tamién tien capiella que s’alcuentra xusto dalantre la casa. Cunta una heredera que “na posesión tien d’haber una ayalga, el tesoru escondíu del antepasáu que la fizo, que vieno de les Indies con siete mulos. Seis d’ellos cargaos de monedes d’oru enteres y sábese qu’éstes gastóles. Pero traxo, tamién, otru mulu cargáu con monedes d’oru cortaes a la metá y éstes enxamás denguno de la familia sepo que les emplegare”. En Corao Castiellu.

Casona de Soto, La (Fernández del Cueto): Ta na oriella manzorga de la carretera que xube de Corao a Llabra, a l’entamu de Coraín. Tien l’escudu coles armes del apellíu Labra onde apaez un caballeru llantando-y la llanza a un Cuélebre. Nesti llugar alcontróse tamién una llábana Vadiniense, “de Serena a la so má Dovidena”, d’acordies colo que conseñen dellos llibros. La casa ye del sieglu XVII.

Castañal, La: Tarrén en La Vega H.ondos. En Corao.

Castañar del Tollu, La: Castañéu que ta ente El Cuetu Aleos y Teleña, diendo per El Camín Real. Tien una castañar mui vieya y cuevanosa, con un furacu pergrande nel tueru, onde puen abellugase tres ó cuatro persones, guapamente, si vien la truena.

Castañéu del Molín de Mundo, El: Prau con cuetu pa escontra la fastera de Llabra. Ta na oriella noreste del Güeña. Tien daqué castañar, y nél había un molín antañu.

Castañéu, El: 1. Llugar patente. Ye’ l ferial de ganáu de Corao. Ta averáu a El Güeña, na oriella drecha, y tien castañares mui vieyes y cuevanoses. N’elli fáense les feries de ganáu, dende va munchu, que son el 17 de xineru per San Antón, el 2 de marzu per Santu Mederu, y el 26 de mayu. Agora hai tamién d’otres en setiembre, ochobre y payares. Anantes duraben selmanes. 2. Dellos praos en Teleña, que tán a la manzorga d’El Camín Reales y qu’entamen en La Caleya La Viña.

Castañéu’l Maestru, El: Castañéu penriba’l barriu La Cortina. En Coraín.

Castiellu de Pamia, El: Alcuentráse sólo’l topónimu. Una informante sintió falar a los sos antepasaos d’esi llugar y cunta, “al paecer taba per Abamia y diz qu’ había una casona desiguada y bastiada, que-y llamáben asina. Y camentábase si nella yera onde había d’aniciar el camín soterrañu qu’empobinaba pa La Torre del Herederu. Y tamiém, nun cartafueyu mui antigu taba conseñáu El Castiellu de Pamia, n’Abamia, que dicía comunicase con La Torre del Herederu”. Créyese güei, que ye la mesma torre que La Torre la Xura, en Sotu Cangues.

Cauvilla: Barriu en Sotu Cangues, qu’salluga metanes El Campu la Xura. Pasa-y la Carretera de Cangues d’Onís-Panes pel mediu. Ellí, ta tamién asitiáu, El Camping Covadonga, na oriella drecha del Ríu Deva.

Cavada, La: 1. Llugar en La Ería de San Nicolás. En Corao. 2. H.aces a llabor, y prau que llinda cola paré de La Vega H.ondos, na oriella drecha d’El Güeña, pa escontra Celoriu. Alcontráronse per esti llugar ferramientes prehistóriques.

Cavadina, La: H.aces de Perlleces, pa escontra Celoriu.

Cavaes, Les: Prau llanu a siega, na ería Aroces. Coraín.

Caxigal, El: 1. Campera en Perlleces. 2. Bosque penriba de Sobrecueva onde s’alcuentra ’l surdimientu de la traida del agua pal pueblu. Pela fastera oeste, el bosque allégase hasta Perlleces, y tamién, pa escontra Celoriu.

Cayantina, La: Tres praos con delles llanaes y daqué arrimaos. Tán en La Ería d’Arriba de Parolu.

Celoriu: Pueblín de la parroquia d’Abamia.Ta asitiáu al oeste d’ésta, y s’alcuentra a la manzorga de la carretera Cangues d’Onís-Panes, ente’l calce de La Riega Cabielles y la oriella drecha del Güeña, nel que hai una presa pal molín del pueblu. L’entrada natural alcuéntrase trespasando una ponte qu’anantes d’iguase yera un pontigu de madera, xusto dempués, de La Torre la Xura de Sotu Cangues. Llenda pel norte con La Cueste Perlleces. Pel sur y oeste con Sotu Cangues. Y pel este con Corao.

Central de La Estrada, La: Ta pembaxo La Estrada, en Riosol, xunto a El Güeña, nun llugar empozáu. Yera una central llétrica vieya.

Ceñal: Prau a l’entamu la carretera d’Isongu. Llenda al norte cola carretera de Cangues d’ Onís-Panes. Esti prau, diz la xente que fuera, cuntayá, un dau pal maestru de la escuela de Corao Castiellu, pero col tiempu, ficíeronse con él los herederos, pagándolu. Agora, hai dientro una cuadra con vivienda, y tien cierru.

Cepéu d’Aleos: Praos pindios con coteres a viesca. Llenden pela manzorga con El Camín Real de Teleña. En Cuetu Aleos.

Cepéu de Teleña: Praos que s’arrexunten colos praos d’El Cepéu d’Aleos, faciendo pica na xuntura. Tán nes cercanies de les primeres viviendes de Teleña, diendo dende Cuetu Aleos. Teleña.

Cernagal, El: Finca a monte. En Perlleces.

Cezures, (Citures): Cuetu arboláu no cabero’l barriu El Bosque. Nél naz El Regueru Cezures, que ye’l llinderu natural cola parroquia de La Riera. En Sotu Cangues.

Cierrón de la H.orcada: En La Cueste La Granda. En Corao.

Cimavilla: Barriu d’Isongu. Tien seis viviendes y pása-y el camín del mesmu nome pel mediu.

Cimenteriu d’Abamia, EL: La xente falando llama-y tamién, “el cimenteriu vieyu”. Ta asitiáu pal llau este de La Ilesia d’Abamia. Agora yá nun ta n’usu pala parroquia.

Cimenteriu de Corao, El: Ye’l cimenteriu que se fizo nuevu pa la parroquia, por tar El Cimenteriu d’Abamia muy lloñe de la ilesia de Corao, dempués de que se dexara L’Ilesia d’Abamia pa l’usu parroquial. La xente falando dél diz “el cimenteriu nuevu”, pa estremalu del vieyu de la parroquia.

Cincuerna: Llugar per onde va un camín qu’ agora ta iguáu en pista, y que xube a Llindagüeres. En Teleña.

Cogolla, La: Cuetu arboláu con prau pindiu. Ta penriba la ería Llerís asitiáu ente Isongu y Sotu Cangues.

Colladones, Los: Praos en La Ería d’Abaxu de Perlleces. Estreménse faciendo collaos.

Colláu d’Aroces: Llámen-y tamién Colláu d'Allá, por tar penriba de Coraín y pa escontra La Cueste Perlleces. En Coraín.

Colláu del Pandal: Llámen-y tamién Colláu d'Acá, por tar pala fastera de Coraín. En Coraín.

Colláu l’Ería, El: Prau a pastu que ta penriba d’Abamia.En Cuetu Aleos.

Colláu Pandal: Colláu con invernales en La Xerra’l Llobete. Teleña.

Colláu, El: 1. Barriu de tres viviendes al llau de Cantez. N’Isongu. 2. Praos nes cercanies de La Canzadiella y del pueblu d’Intriagu. 3. Caseríu nun coteru de Pedrugada. Ta penriba La Estrada, a la manzorga del la carretera Cangues d’Onís-Panes. 4. Barriu de Teleña con dos viviendes y güertes.

Comicosa, La: Llugar con praos onde hai un chamizu de piensos, agora ta desdexáu. Llámen-y col nome de la sociedá comercial que lu fizo. Ta na oriella drecha de la carretera Cangues d’Onís-Panes. Antañu había ellí una teyera. En Sotu Cangues.

Conexera La: Güertín zarráu con muriu al llau d’El Palaciu Cambre. En Sotu Cangues.

Conquista, La: Finca pergrande y patente, dientro d’ella alcuéntrase La Casa la Peñe. Ta mui bien asitada nun peñascal de Corao Castiellu, dende onde puen avistase cauna de les entraes al valle de Corao, y tamién, les de dellos pueblos de la parroquia. Pal norte vese Coraín, Sobrecueva, Parolu y la carretera que va pa la parroquia de Llabra. Pal sur, Abamia, Corigos y Isongu. Pal este, Intriagu y La Estrada. Pal oeste, Celoriu y Sotu Cangues. Na fastera este de la finca, hai restos ruinos d’un cachu de torrina mirador, fecha de piedra, y con un ventanu amirando p’Abamia. Pal llau oeste, hai una llombina con un cachu parea esfargayada dende onde s’avista perbien l’entrada per Tornamila a Corao, viniendo nel sen de la carretera Cangues d’Onís-Panes. Anque’l tarrén ye llanu, hai pedazos de tierra calteníos per cachos de pareas esfardanaes. Dientro la mesma finca ta’l tarrén nomáu La Güertona. Informen los amos d’ésta, “atopóse un bon corneyal de piedra y delles llábanes bien trabayaes, tando nos llabrando’ l tarrén. Y los más vieyos del pueblu cunten que sintieron dicir a los sos antepasaos qu’ellí habia de tar el castiellu de Pelayo ó daqué castiellu mui antigu”. La fastera del tarrén que llenda con Corao, ye un peñascal arboláu de munchu altor pel que baxa La Caleyina de Peñapeñil, arrequexada pente l’arboláu, y que sal a Les H.uentines, ente Corao y La Estrada. Agora, esti pericuetu ye’l llinderu natural cola carretera de Cangues d’Onís-Panes, dempués d’ iguase ésta, y pasa tres Corao. En Corao Castiellu.
Coraín: Pueblín que ta asitiáu penriba de Corao, na fastera oeste del valle del Ríu Chicu, y a la manzorga de la carretera que sal de Corao pa Llabra. Ta nun coteru con vistes a Abamia, Isongu, Corigos, Corao y Corao Castiellu. Pel norte llenda con Sobrecueva, y pel sur con Corao

Corao: Pueblu qu’agora ye la cabeza de la parroquia d’Abamia. Ta asitiáu na fastera central del conceyu de Cangues d’Onís. Ye un valle que va d’este a oeste, estrechu y patente, envallegáu ente la oriella drecha del Gueña pel sur, y les orielles d’El Ríu Chicu pel norte. El Puente Tornamila ye l’entrada al pueblu pel oeste, y al este entráse per Les H.uentines. Agora arródialu la carretera Cangues d’Onís-Panes pel norte, que taraza les finques d’esi llau a la metá. Anantes de la igua, esta carretera pasaba pel mediu’l pueblu. Llenda al norte con Coraín y Corao Castiellu. Al sur con Abamia, Isongu, y Corigos. Al este con La Estrada. Y al oeste con Celoriu. Tien mui bones caseries y posesiones. Ye perconocíu, mesmamente fuera d’Asturies, poles perimportantes feries de ganáu, que se faen nel ferial d’El Castañéu tres vegaes al añu. Nel pueblu, según informen los vecinos “s’alcontraron delles lápides Vadinienses va tiempu”, fechu conseñáu tamién nos llibros. El 15 d’agostu ye la fiesta’l pueblu, festéxase Nuestra Señora.

Corao Castiellu: Pueblu de la parroquia asitiáu nun cotarón. Ta na fastera drecha del Güeña, al noreste de Corao y baxo La Cueste Igüedu. Al norte y este llenda coles parroquies de Llabra y Grazanes, y al sur con Corao. La xente del llugar diz qu’el nome del pueblu deberíase a que nél había de tar el castiellu de Pelayo, y creyése que taría allugáu na finca La Conquista, ó qu’hebo nesi llugar daqué castiellu mui antigu.

Corea: Praos a pastu pindios, nun llugar envallegáu y con peñascales pelos llaos. En La Estrada.

Corigos: Caseríu con munchu tarrén alredor, dello cuestu y peñasqueru por tar arrimáu a La Peñe Isongu. Tien h.aces a llabor, praos a pastu y dalguna viesca. Asitiáse na oriella manzorga del Güeña, ente Isongu y Abamia. Per ellí cuerre la riega La Güeñaz.

Corona, La : Llugar na coroniella de La Cueste Igüedu onde, apocayá, punxeron una antena pal teléfonu. Tien pista pa dir a lo cimero. Ellí alcuéntrase un mirador, aviastando tol valle d’El Güeña, Onís, la parroquia de Llabra y la de Grazanes. En Corao Castiellu.

Corralinos, Los: Invernal cuestu con xerru y matoxu. N’Intriagu.
Corredoria, La: Calle fecha nel camín antigu que diba pa Llabra. Ta xunto a El Palaciu de los Noriega. En Corao.

Corros, Los: Praos de bona siega que tán en La Rotella. Per ellí cuerre una riega de mal tiempu. En Corao Castiellu.

Cortalaire: Caseríu solitaríu, nun cuetu desabellugáu. En Sobrecueva.

Cortina, La: 1. Barriu en Coraín, con dos viviendes y les finques que lu arrodien. 2. H.aza pembaxo El Pandal, apegando con La Cueva’l Cuélebre. En Coraín.

Corves, Les: H.aces de Les Cruces. N’Isongu.

Corvinos, Los: Prau a pastu, ta na ería Santu Mederu. N’Isongu.

Costanes: Praos que tán dempués d’El Regañáu y La Cueste. N’Isongu.

Costazu, El: Arboláu d’ocalitos. Cruciálu La Riega la Pandiella. N’Intriagu.

Coteru, EL: Llugar altu onde hai praos arrimaos y un barriu na llanada. En Teleña.

Coviella, La: Castañéu apegáu a El Castañeín y que ta al pie del prau L’Arbeyu. En La Peñe Isongu.

Cruce, El: Barriu de Sotu Cangues, al llau de La Venta. Ta na cruz de les carreteres de Cangues d’Onís a Panes y de Cuadonga.

Cruceru, El: Prau a pastu a la manzorga de la carretera que va pa Teleña dende Intriagu.

Cruces, Les: 1. Tarrén extremáu en h.aces bien echaes, y que ta na ería Llendespina. N’Isongu. 2. Prau n’El Cuetu Aleos.

Cruz de Priena, La: Llugar no cimero de Priena. Ellí hai una cruz qu’antaño conocíase, según un informante, como, “La Cruz de Pelayo” y que taba fecha de madera de carbayu. Punxéronla los neños de la escuela de Corao nos anicios del sieglu pasáu. Dempués de la Guerra Civil mudóse pola de fierro que ta ellí agora. El cumal ye una talaya natural dende onde puen avistase dellos montes d’otros conceyos: al sur Peñalba y Peña Sienra. Al noroeste El Sueve. Al noreste la sierra d’El Cuera y el valle d’Onís. Y al sureste La Cueste Següencu.

Cruz, La: 1.Cruz de caminos qu’enllaza con La Caleya Rales. En Teleña. 2. Invernal con tres cuadres, d’ellí sal el camín d’El Pozalán a La Capilla la Puerte. En Teleña. 3. Llugar con cuadres y prau apegáu. Ta daqué separtáu del pueblu, na cruz de caminos ente El Pozabal y L'Aspra. N’Isongu.

Cuadrada, La: H.aces a llabor. Son de munchos amos. Tán na ería La Vega H.ondos. En Corao.

Cuadrico, El: Tarrén n’ El Bravial. Tien cinco carros de cuchu. En Corao.

Cuadrín, El: 1. Prau a pación. En Coraín. 2. Prau en La Ería de Celoriu. 3. H.aces a llabor tres Cantez. N’Isongu. 4. H.aza a llabor. En Corao Castiellu. 5. Prau en Perlleces.

Cuadrón de los Moralones: Tarrén na ería Llendespina. Isongu.

Cuadrón, El: 1.Prau a siega asitiáu en Les Lloses. Perlleces. 2. Prau na ería Llendespina. Isongu.

Cuadros Malos, Los: Llugar na ería La Vega H.ondos. Corao.

Cuadru, El: 1. Llugar na ería La Vega H.ondos. En Corao. 2. Llugar na ería Llambréu. En Corao.

Cuayada, La: Peñarascu con pasu d’oveyes y vaques. En La Peñe Isongu.

Cubila, La : Dos tires llargues de prau cuestu a herba na ería Güedu. En Sotu Cangues.

Cubu, El: Llamarga onde punxeron el tueru güecu d’un árbol, pa recoyer l’agua que surde ellí mesmu. En Teleña.

Cucarrandi: Fonte perbona y perconocía. N’Intriagu.

Cuchilloríu, El: Prau allargáu na oriella manzorga d’El Güeña. Va dende L’ Estancu del Molín a La Riega Cabielles. En Sotu Cangues.

Cuenyu: 1. Finques bones y h.aces. Tán enantes de llegar a la ería Santu Mederu p’El Camín de Cuenyu, penriba de La Pasada. N’Isongu. 2. Prau con pomares a la manzorga de la carretera d’Isongu, rayando col llugar del mesmu nome. Isongu.

Cueñe, La: caleyina envallegada y rigüeta. Entama cara a La H.uentona y xube pal barriu El Colláu. N’Isongu.

Cuerre la Cantera: Ye una cuerre muriada pa recoyer castañes. En Teleña.

Cuerria de Riañu: Castañéu. Ye dellos amos. Va dende la cruz de La Barreda a Riañu. En Corao.

Cuerries de Mediu: N’Isongu, ta pa Trespumar.

Cuerrona, La: Barriu en Coraín.

Cueste Igüedu, La: Monte. La xente falando diz a vegaes El Monte. D’otres vegaes La Cueste, ó, Igüedu sólo. Pero polo xeneral conozse col nome que damos na entrada. Allúgase na fastera meridional de les xerres litorales del Cantábricu. Ye calizu no cimero y con matoxu nes lladeres. Hai camperes, finques y viesques a ocalitos. Ye comunal. Tien un mirador nel cumal nomáu La Corona. Asítiase al noreste de Corao, xusto enriba de Corao Castiellu y raya coles parroquies de Llabra y Grazanes. Los pastores de la parroquia llamen igüedu al cabritu nel primer añu de vida.

Cueste Intriagu, La: Cueste12 a ocalitos y enllena d’argomal. La metá ye dellos amos y la otra metá comunal. Ta pa escontra Teleña. N’Intriagu.

Cueste la Granda, La: Tarrén de finques y praos a monte con matoxu y argomal. Entama na metá drecha d’El Canaloriu y baxa allegándose hasta les cercanies d’El Güeña, onde faise un areneru. En Corao.

Cueste Parolu, La: Cueste a la que s’arrima La Ería de Parolu. La fastera oeste de la mesma ye La Cueste Perlleces.

Cueste Perlleces, La: Cueste con camperes pindies. Ta penriba del barriu Miriacal de Perlleces Llenda con La Cueste Parolu pola fastera este y al sur con Celoriu.

Cueste Quemada: Cueste na lladera de Priena. Ta penriba La Xerra’l Llobete. Nómenla asina polo ermo que ye’l tarrén. En Teleña.

Cueste Torió, La: Lladeres de la fastera oeste d’esa cueste y que tán a la llende del barriu d’El Bosque. Estes lladeres son el llinderu cola parroquia de Cangues d’Onís per esi llau. En Sotu Cangues.

Cueste, La: 1. Barriu d’una vivienda, horru y cuadra. Ta xunto al prau del mesmu nome, penriba Castañeda. 2. Pradón rigüetu a pastu y que ta apegáu al barriu del mesmu nome. Dambos n’Isongu. 3.Tarrén a monte na ería Santu Mederu. Isongu.

Cuestes, Les: Tarrén na ería Santu Mederu. N’Isongu.

Cuestines, Les: Prau rugüetu a pastu, na ería Santu Mederu. Isongu.

Cuestiquina, La: Argomal nuna llomba, con prau y daqué arboláu. Ta pembaxo de Cuetu Aleos.

Cuetu la Robellada, El: Peñascal picudu penriba Llindagüeres. En Teleña.

Cuetu Pedreguñes, El: Un cuetu pedregalosu, atacáu d’argomal y matoxu. En La Peñe Isongu.

Cuetu Valdelapiedra: Castañéu allugáu nun cuetu con xerru. Llenda con praos polos llaos y allárgase hasta El Regueru Umandi, n’Intriagu. En Teleña.

Cuetu, El (~ Cuetu Abamia): Barriu un cachu penriba d’Abamia. Tien praderíes pindies y viesques. Hai cinco viviendes con cuadres. La xente falando diz El Cuetu pa estremalu d’Aleos. N’ Abamia.

Cuetu, El: Llugares habitaos con praos y viesques penriba d’Abamia. El barriu y les finques que tán nes cercanies d’Abamia, ye conocíu como Cuetu Abamia. El barriu y la ería que tán penriba d’El Cuetu Abamia y pa escontra Teleña, llámenlu Cuetu Aleos. Ver Aleos. En Corao.

Cueva la Melandrera, La: Cueva pela que cuela El Regueru Cabielles. Ta na ería Güedu. En Sotu Cangues.
Cueva les Bruxes, La: Yera una caverna con pinganizos13. Ta pembaxo de Piedrallacia, nes cercanies de La Estrada. Cola igua la carretera de Cangues d’Onís a Panes, quedóse nun pericuetu cortáu y nun pue dise a ella. En Corao Castiellu

Cueva Llambriago, La: Peñarascu con paré que fai cueva, onde surde La H.uente Llambriago. No cabero la cueva faise un pozu col mal tiempu y l’agua pinga, tamién, pente’l sotechu de la mesma. Nella refuxóse la xente na Guerra Civil. En Corao Castiellu.

Cueva los Suspiros, La (~ La Cueva Xerruca): Ye un paré con una cuevina y riega que fai La H.uente Corigos, nel prau La Xerruca. Camienta la xente que la cueva allargaríase pel soterrañu d’El Prau Abamia hasta l’ilesia mesma. Cunta un informante: “A lo meyor sedría’l camín soterrañu qu’empobinaba dende Abamia pa La Torre del Herederu”. Otru informate diz: “ Los rapaces xugando nella metíamonos pa dientro, y había pasillos mui baxos y estrenchos como enanchaos, polos que malpenes podía pasar unu enclicáu”. En Corigos.
Cueva Oviedo, La: Cuevón que fai un paré. Ta ente La H.orcada y el prau Escarpín. En La Peñe Isongu.

Cueva, La: Monte qu’arrodia La Cueva Llambriago, allegándose hasta El Camín del Riberu. En Corao Castiellu.

Cueva’l Cuélebre, La (~ Cueva Frassinelli): Cueva con tarrén arrimáo que ta xunto a un peñascal arboláu. Ta penriba de la ería San Nicolás. Llenda al norte col pueblu de Coraín. Llámen-y tamién La Cueva de Frassinelli. Esti alemán fízose cola posesión d’ella y col tarrén que l’arrodía nel sieglu pasáu. Fízo terraces nel tarrén pa llantar frutales onde xorrecíen perbien. Él mesu escavó na cueva y alcontró delles ferramientes de cobre y un ídolu de piedra de l’Edá del Bronce, de lo que falen dellos llibros d’hestoria. Cunta una informante la lleenda que lla xente de la parroquia conoz: “Na cueva añeraba un Cuélebre al qu’habíen d’echa-y una xata diaria, pa que-yos dexara travayar en La Vega H.ondos, que ta baxo la cueva. Entós, el cura d’Abamia h.artucáu del asuntu, un día, allegóse a la cueva cola cuenta de desanicialu. Y asonsoñando les culiebres echó-y un xiblíu pel h.uracu la madriguera pa h.acelu salir. Namái que llegó’cuélebre aportó, el cura pegó-y un tiru nel gargüelu y fuxó al trote nel so caballu empobinando p’Abamia. El cuélebre, mancáu, foi tres d’elli. Pero‘l caballu estrapallóse-y pola escorribanda, asina qu’el cura hebo de vadiar El Güeña a pie, per onde agora ta El Puente Abamia. El cuélebre metióse nel ríu tamién, y entró-y l’agua pel furacu del tiru, afogándose ellí mesmu. Dempués, sacáronlu pal camín Canaloríu, que ta al pie, onde tevo en canal munchu tiempu podreciéndose”. Nos cartafueyos d’escritures antigües ta conseñáu, tamién, el nome de “Cueva Cuh.erreru,” y “Guf-ferrero”.

Cueva’l Raposu, La: Tarrén nes cercanies de La Capilla Santa Ana. N’Intriagu.

Cuevu Collía, El: Colladín con campera que ta ente La Xerra’l Llobete y les lladeres de Priena, penriba de Llindagüeres. En Teleña.

Culeru, El: Prau a herba rigüetu, nes cercanies del barriu La Cortina. En Coraín.

Curva, La: Vuelta degolada, que facía la carretera vieya de Cangues d’Onís a Panes, en La Estrada, y que desapaeció cola igua d’ésta.

Deva, El: Ríu que vien de Cuadonga, y ta formáu poles agues d’El Ríu Les Mestes, que se sumen n’Orandi y surden en La Cueva de Cuadonga. Recueye tamién l’agua d’El Reinazu que vienen d’El Llagu Enol, y les de La Riega la Guxana, que vien de les lladeres de Priena. Cuerre pel sur de Sotu Cangues y yá, n’El Campu la Xura,entemécese con El Güeña, n’El Puentón de la Mecedura. En Sotu Cangues.

Duernes, Les: Castañéu pergrande qu’allega a La Peñe Isongu. Ta estremáu en delles viesques. Ye de munchos amos. Isongu.

Encarreña, La: H.aces a llabor en La Vega d’Intriagu.

Encima la H.uente: Llugar na ería Santu Mederu. N’Isongu.

Encima’l Praín: Monte en Celoriu.

Encima’l Riberu: Castañéu n’Abamia.

Entelah.uente: Prau con h.uente que naz nel mesmu prau. N’Isongu.

Ería Coru, La: Ería pindia a praos y h.aces. Ta rayando con Sotu l’Ensertal que ye yá de la parroquia de Mestes de Con. N’Intriagu.

Ería d’Abaxu, La: 1. Praos pindios a siega que llenden con Otura. Debaxu tán les cases de H.ondevilla. En Teleña. 2. Praos a siega n’El Barriu Abaxu de Perlleces. 3. Posesión y munches finques de Parolu.

Ería d’Aleos, La: Praos n’El Cuetu Aleos. Tán penriba d’Abamia pa escontra Teleña.

Ería d’Arriba, La (~ La Ería Parolu): Finques onde s’allúga El Palaciu de Parolu. Conozse tamién como La Ería Parolu. Ta penriba de Coraín.

Ería d’Arriba, La: Finques a siega. En Perlleces.

Ería de Celoriu, La: Praos llanos y bien figuraos a orielles del Güeña. En Celoriu.

Ería de Parolu La: Son tres posesiones: Penriba, les finques d’ El Palaciu de Parolu y La Cayantina; Pembaxo, La Portielllona.

Ería del Pandal, La: Finques a herba qu’arrodien La Capilla de Santa Eugenia. En Sobrecueva.

Ericón, L’: Praín a herba bonu y bien echáu. En Celoriu.

Escarpín, L’: Camperina pindia y en forma triágulu. Ta penriba Corigos, pa escontra La Peñe Isongu y agora tomóse d’ argomal y de felechu. Corigos.

Escobal, L’: Llugar en La Vega H.ondos, con riega que-y pasa pel mediu. En Corao.

Escuela, La: 1. Edificiu de la escuela y les sos viviendes y tarrén de xuegos. Ta nes cercamnies d’El Castañéu. En Corao. 2. Llugar en Sotu Cangues onde antañuotaba la escuela y qu’ agora fízose un hotel. 3. Pórticu de La Capilla San Antón nel que ficieron la escuela pal pueblu de Corao Castiellu.

Esñera, La: Prau a pación. N’Isongu.

Espinadal, L’: Prau a matoxu y con xerru pel mediu. En La Ería d'Abaxu de Perlleces.

Espinera Redonda: Llugar a pastu comunal, con viescu a matoxu y dello xerru. Hai tamién un pasu d’oveyes y vaques pa dir a El Puertu de la Montaña de Cuadonga. En La Peñe Isongu.

Estancu, L’: Presa fecha nel Güeña onde se recoyía l’agua pa El Molín de Celoriu. En Celoriu.

Estrada, La: Pueblu asitiáu pal este de la parroquia d’Abamia. Tien catorce viviendes, delles vacies. Ta ente Corao ya Intriagu. Allúgase nes orielles drecha y manzorga d’El Güeña. Pása-y la carretera Cangues d’Onís a Panes pel mediu.

Fragua, la: Viesca allugada ente’l barriu Castañeda y Campu la Vara. Tien bidules, castañares, umeros y daqué carbayu. Llámen-y asina porque ellí había una fragua antaño y entovía ta la caseta que s’ iguó nun va muncho. N’Isongu.

Fresñu, El: Casería con praos. Ta daqué separtáu y penriba’l pueblu, pa escontra Teleña. Intriagu.

Galguera, La: Prau arrimáu al llau de Ceñal, na oriella drecha de la carretera que xube pa Isongu. Enantes yera un castañéu.

Gallinera, La: Finca bien echada, penriba de Retortura. Ta en La Ería d’Abaxu de Parolu.

Gansu, El: Tarrén en La Ería d’Intriagu.

Garah.e, El: Llugar en Celoriu, onde ficieron un garaxe agora. Ye un llugar de cruz de caminos d’onde sal el ramal que xube pa Perlleces y el principal del pueblu.

Garfiu, El: Prau con valleyes na ería Santu Mederu. N’Isongu

Gatu, El: Praos patentes, asitiaos ente les orielles de la carretera Cangues d’Onís a Panes y d’El Güeña, nes cercanies d’Isongu. En Sotu Cangues.

Golubu, El: Prau en Cuetu Aleos.

Grandera, La: Ribayu arboláu y mata, onde s’allúga un zoo col mesmu nome. En Sotu Cangues.

Granxu, El: Prau desapaecíu cola igua de la carretera Cangues d’Onís a Panes. Taba ente La Casa Nueva y El Prau Molín. En Corao.

Guariza, La: Pasu d’oveyes y vaques en La Peñe Isongu.

Güedu: Cueste con ería. Tien praos arrimaos nes lladeres y dellos llanos en baxo. Ta pal oeste rayando cola carretera que va pal pueblu de Cabielles y de la parroquia de Cangues d’Onís. Allárgase dende La Grandera a La Venta. En Sotu Cangues.

Güeña, El: Ríu que naz en La Robollada, conceyu d’Onís. Va recoyendo l’agua de tolos ríos, regueros y riegues de los llugares per onde cuerre. N’Intriagu, mécese col calce d’El Regueru Umandi. En Corao, cueye les agues d’El Ríu Chicu y les de la riega L’ Agüañaz. En Sotu Cangues xúntense-y El Deva, La Riega Cabielles y El Regueru d’Onao. Y d’ellí va pa Cangues d’Onís onde s’amiesta con El Seya.

Güañaz (~ Güeñaz): Camín que va pa Corigos dende Santu Mederu pela oriella de la riega L ‘Agüañaz. N’Isongu.

Güerta Cortés, La: Prau en Cauvilla, al pie d’El Camping Covadonga. En Sotu Cangues.

Güerta la Torre, La: Prau qu’arrodia La Torre La Xura. En Sotu Cangues.

Güerta María, La: Tarrén muriáu sobre sí qu’arrodia La Casa María. Ta ente’l barriu La Bolera y La Conquista. En Corao Castiellu.

Güerta Pina, La: 1. Prau bonu, pergrande, soleyeru y llanu. Llenda con El Ríu Chicu y con La Calle l’Agua. Antaño había pomares. Tien dos cuadres y canaliega de riegu mui vieya, que cueye l’ agua d’El Ríu Chicu. Esta canaliega cedióla l’estáu a los amos en propiedá, cuntayá. Pel llau d’El Ríu Chicu tien, fresnos, chopos y un cachu n’abertal. En Corao. 2. V. El Befal

Güerta, La: 1.Finca xunto a El Palaciu de Cambre, na oriella d’ El Deva. En Sotu Cangues. 2. Llámense asina tolos praos apegaos a les cases, o nes cercanies d’elles, onde planten polo xeneral, verdures, frutales y semen fabes, arbeyos etc.

Güertes, Les: 1. Praos na ería Llendespina. Isongu. 2. Dos praos baxo’l bosque El Reborial. Tán a la drecha, na entrada al pueblu de Celoriu. Unu ta arrimú a la lladera’l monte y l’otru, pembaxo, ye llanu y zarráu con muriu.

Güertina, la: Finca en Perlleces.

Güertón, El: Prau nel sitiu de Les Lloses. En Perlleces

Güertona los Campos, La: Prau nel barriu Los Campos. En Corao.

Güertona, La: 1.Tarrén a prau y a llabor, patente y pergrande. Ta dientro la finca La Conquista. En Coaro Castiellu. 2. Prau llanu y soleyeru xunto a La Ilesia d’Abamia. Diz un informante: “Sedría d’un conventu monxos agora desapecíu, que taba allugáu nes cercanies de la La Retoral d’Abamia”. N’Abamia.

Güertu la Corralada, El: Güerta xunto a La Casona de Soto Labra. En Corao Castiellu.

Güertu, El: Finca a pastu. En Perlleces.

Güesal, La: Prau bonu. En Celoriu.

Güeyu Baxu, El: 1. Prau a monte con daqué arboláu. Ta baxando pel camín de L’Aspra, rayando con Combes, nes cercanies de la parroquia de La Riera. N’Isongu. 2. Riega que baxa del castañéu Cambarosu y que surde nel prau del mesmu nome. N’Isongu.

Güeyu la Riega, El: Surdimientu d’una fonte que fai riega y cuerre pente’l castañéu d’El Valle la Riega. En Celoriu.

H.acina’l Camín, La: H.aza chica en La Vega H.ondos. Corao.

H.abariega. La: Caseríu con praos pal llau de La Metía. Ta llendando cola parroquia de Llabra. En Perlleces.

H.aza Bernalda, La: H.aza cuadrada y bien echada. En Coraín.

H.aza Cimera, La: Prau con pumares, en La Ería de Celoriu.

H.aza Cuenyu, La: Praos bonos a pastu. Tán enantes de la ería Santu Mederu, diendo per El Camín de Cuenyu. N’Isongu.

H.aza Llana, La: H.aza a llabor, en La Ería d’Arriba de Perlleces.

H.aza los Campos, La: Tarrén a llabor, na ería La Viña. Corao.

H.aza Redonda, La: Prau a siega zarráu sobre sí. En Coraín.

H.aza’l Santu, La: Tarrén na ería La Viña. Corao.

H.azona, La: 1. Prau a siega en La Ería d’Arriba de Perlleces. 2. Prau a siega. En Coraín.

H.errerines, Les: H.aces a prau tapín, na ería Santu Mederu. Tán cara a El Pozu los Corvinos. Llenden al este con Abamia. N’Isongu.
H.ondevilla: Barriu de dos viviendes separtaes. Una ta pa La Portilla. La otra en La Ería d’Abaxu. Hai praos rigüetos a siega pendabaxo les cases y llenda con Otura. En Teleña.

H.ondrigu, El: 1. Tarrén a llabor, no caberu La Vega H.ondos, pa escontra Celoriu. 2. Prau averáu a El Camín p’Abamia. En Celoriu.

H.orcada, La: 1. Cruz de caminos ente’l Cuetu Aleos y La Caleya Rales de Teleña. Fai parte de lo que se conoz dende’l sieglu pasáu como “La Ruta Frasinelli” Ye un cachu camín que sal a Güesera yá,en La Montaña de Cuadonga. 2. Praos a pastu que tán pela carretera que xube pa Teleña. 3. Terrén en La Cueste la Granda que llenda pal este con camín y pal sur con Rialeos. En Corao. 4 Monte a castañares, carbayos y con una cuerria. N’Intriagu.

H.orcadielles, Les: Llugar en Santu Mederu. N’Isongu.

H.orcadín, El: Campera a pastu en La Xerra’l Llobete. En Teleña.

H.orechada, La: Cuadres agora desdexaes y dellos praos zarraos en cárcova. En Coraín.

H.ornellada, La: Prau a pastu. En Perlleces.

H.uente Baxu, La: Fontina n’El Barriu Abaxu. En Perlleces.

H.uente Cauvilla, La: Fonte nel barriu de Cauvilla. En Sotu Cangues.

H.uente Caxigal, La: Fonte que s’alcuentra ente Sobrecueva y Perlleces nel monte El Caxigal. Tien depósitu d’agua con zarru pal usu de Sobrecueva.

H.uente Cima, La: Naz nel castañéu col mesmu nome, penriba El Escarpín. Surde no cimero del prau l’Arbeyu y tien tamién bebederu. En La Peñe Isongu.

H.uente de Secaes, La: Fonte que cuerre pente llastres, en Secaes. Surde pente peñe y hai que coyer l’agua nel cóncanu la mano. Enxamás se seca. En Corao Castiellu.

H.uente de Suh.ornu, La: Fonte que surde pente llastres, n’El Suh.ornu. En Corao Castiellu.

H.uente del Coteru, La: Asitiáse ente La Caleya La Viña y el Camín Real. EnTeleña.

H.uente del Peyu, La: Fonte nes finques d’El Peyu, al llau de La Rotella, nes cercanies de La Cueste Igüedu. Ye una fonte pa beber na mesma llaguna onde surde l’agua. En Coaro Castiellu.

H.uente la Pebida, La: Fonte nel tarrén de La Pebida. En Cuetu Aleos.

H.uente la Pipa, La: 1. Fonte onde naz agua abondo y faise una riega que cuerre pel prau La Pipa. D’ellí traen l’agua pal pueblu de Perlleces. Ta na Cueste Perlleces. 2. Fonte en La Cantera. Surde per un tarucu del castañéu, cuerre pente pizarra cayuela y dempués cai nun bebederu pal ganáu. N’El Cuetu Aleos.

H.uente la Pipina, La: Bebederu p’abebentar el ganáu, nes cercanies d’El Sulhorru Xuntes. En Teleña.

H.uente la Rotella, La: Ver La H.uente Supiedra.

H.uente la Vega, La: Fonte que surde na oriella drecha d’El Deva, xusto detrás d’El Molín del Partidor. En Sotu Cangues.

H.uente les Caldes, La: Surdimientu d’agua baxo la Peñe Isongu.

H.uente les Piperes, La: Fonte allugada nel camín antiguu que va de Corao a Llabra, na fastera manzorga d’El Rìu Chicu. L’agua sal d’una cuevina y recuéyese nuna fonte iguada con llábanes. Tien dos poyos fechos de llastres nos llaos. Vien de la finca Sulavilla de Corao Castiellu. En Corao.

H.uente Llambriago, La: Fonte qque sal pente roca na cueva del mesmu nome recoyéndose l’agua nun depósitu fechu de llábanes, del que sal per un churru. En llegando’l mal tiempu la cueva enllamárgase y l’agua pinga abondo pente la roca mesma. Hai un llavaderu fechu de llábanes curioses y roxes. A la drecha’l llavaderu, hai un escañu iguáu con bones llastres y arrimáu contra turria. En Corao Castiellu.

H.uente Llanu, La: Finca a pastu. En Perlleces.

H.uente Llosorada, La: Surdimientu d’agua nel prau Llosorada. En Perlleces.

H.uente los Caños, La: Fonte nel barriu Miriacal de Perlleces, con dos caños, llavaderu y bebederu. Ye d’una traida mui antigua y foi un dau d’un señoritu pal pueblu.

H.uente Mariña, La: Fonte asitiada en La Caleya Mariña. En Perlleces.

H.uente Prieta: Monte comunal onde naz El Regueru Umandi. Ye la llende de la parroquia d’Abamia que ta más al sur. Ta ente Intriagu, Teleña, y Sotu L’Ensertal, ésti yá na parroquia de Mestes de Con.

H.uente Rialbor, La: Fonte pembaxo de Llindagüeres. D’ellí xuben bonbiando l’agua pal usu del pueblu. En Teleña.

H.uente Robín, La: Fonte que ta nel prau Robín. En Perlleces.

H.uente Rozada, La: 1. Fonte allugada nel castañéu Les Rozaes. Baxa de La Cueste Parolu a Sobrecueva y ellí recuéyese nun bebederu pal ganáu. Ta penriba d’El Palaciu de Parolu. En Parolu. 2. Riega p’abebentar el ganáu y llamarga onde antaño llavaben. Ta asitiada a l’entamu d’El Caleyón del Rozu. En Perlleces.

H.uente Sulavilla, La: Fonte de mui bona fechura na ería Sulavilla. Nun tien cañu y da agua perbono, claro y qu’enxamás enturbia. Agora ta toa desdexada, atacada d’artos y de matoxu. Un informante camienta que “debieron h.acela los moros, polo curiosu que ta fechu l’arcu, que ye de llábanes roxes y ta arrodiando’l gorgolitu d’agua que surde del suelu penriba. Amás ye mui antiguísima”. En Corao Castiellu

H.uente Supiedra, La (~ h.uente la Rotella): Fuente na ería La Rotella, nes lladeres de La Cueste Igüedu. Llámen-y tamién La H.uente la Rotella. Ellí ye el surdimientu de l’ agua que va pal pueblu de Corao Castiellu.

H.uente, La: 1. Tarrén na ería Sulavilla, en Corao Castiellu, onde sal La H.uente Sulavilla. 2. H.aza na ería Santu Mederu pela que cuerre agua. N’Isongu 3. Posesión con casa y finques en La Ería d’Abaxu de Parolu. Tien fonte que gorgolita pembaxo d’una cueva y l’agua ha de sacase con un calderu. 4. Sitiu arrimáu a un peñascal onde ta’l llavaderu y la fonte de Sobrecueva, al entamu’l pueblu. Tien depósitu de llábanes pel que sal un chorru d’agua y un llavaderu de llastres bien fechu. Tamién hai bebederu pal ganáu que fai una riegina pel camín. En Sobrecueva.

H.uente’l Carrizal, La: Fonte con riega que baxa de Sobrecueva hasta El Ríu Chicu, n’El Carrizal. En Coraín.

H.uente’l Caxigal, La: Fonte con depósitu d’agua no cimero El Caxigal. Ta ente Perlleces y Sobrecueva.

H.uente‘l Chorru, La: Fonte que pinga agua abondo faciendo riega y que vien d’Orientes. Cuerre pel sitiu de Les H.uentes y baxa a Mora, onde s’axúnta con El Regueru Umandi, yá n’Intriagu. En Teleña.

H.uente’l Cuélebre, La: Fonte que surde pente llastres. Ta na mesma carretera que xube pa Teleña, nes cercanies de Fresñu. N’Intriagu.

H.uente’l Cuetu, La: Fonte que naz penriba La H.orcada, baxa per El Cuetu Abamia, cuerre per Trescuellu, y cola metanes los praos d’El Tapón. En Cuetu Abamia.

H.uente’l Gorgoritu, La: Un chorru d’agua que surde del suelu penriba, en La Llosona del barriu La Bolera. En Sotu Cangues.

H.uente’l Pipón, La: Fonte mui bona. Naz nes lladeres de La Cueste Igüedu y baxa en reguerada, cuerre tol añu y val p’abebentar el ganáu. En Corao Castiellu.

H.uente’l Tuxu, La: L’agua surde nun pozu al ras del suelu, y recuéyese nel tarucu d’una castañar cuevanosa. Faise riega col mal tirmpu. En Perlleces.

H.uentes de Robín, les: Fonte de la que surde un gorgolitu d’agua y que naz en Robín. Ye l’agua que vien pal pueblu de Perlleces.

H.uentes, Les: 1.Barriu de dos viviendes, dambes con horros, allugáu onde tamién taba l’antigua fonte del pueblu. En Corao Castiellu. 2. Campera per onde cuerre una riega de mal tiempu que vien d’Orientes. En Teleña.

H.uentines d’Abaxu, Les: Bebederu p’abebentar el ganáu pembaxo de Les H.uentines d’Arriba. L’agua sal pente’l matu d’un sucu y ye de mal tiempu, con agua hasta mayu. Ta nuna llanadina, na encruciyada de caminos onde fina El Caleyón de La H.uana y entamen El Camín de Castañeda y la caleyina de La Llongar. N’Isongu

H.uentines d’Arriba, Les: Bebederu natural p’abebentar el ganau. L’agua surde del mesmu sucu nel que s’alluga y faise pozu con agua hasta mayu. Ta na oriella drecha de La Riega Xiro, nel barriu de Castañeda. N’Isongu.

H.uentines, Les: Llugar en Corao de tarrén bravío con ablanos. Llenda con El Güeña y El Camín Real del pueblu. Ta saliendo del pueblu pel este, pa escontra La Estrada, nes cercanies d’El Pozu L’Estancu.

H.uentona de la Estrada, La: Fonte dientro d’una cueva col agua calentino. Antaño la xente de Corao diba ellí a llavar el mondongu, si taba malo pa dir a El Vao n’El Güeña. Desapaeció cola igua de la carretera Cangues d’Onís a Panes, anque entovía sal pel sucu muncha agua. En La Estrada.

H.uentona, La: Llavaderu, bebederos pal ganáu, y fonte antigua principal del pueblu. Ta a l’entamu del pueblu, nun llugar envallegáu ente la oriella manzorga de la carretera que xube y la oriella manzorga de La Riega Xiro. Tien agua de contino. Tevo desdexada pero iguóse hai poco. N’Isongu.
H.ueru, El: H.aza a trabayantíu, en La Ería d’Arriba de Perlleces.

H.unfría: Camín peonil que xúbe pa El Puertu de la Montaña de Cuadonga. En Teleña.

Hedráu, El: H.aza en Sulavilla. Corao Castiellu.

Ilesia d’Abamia, La: Antigua ilesia de la parroquia hasta 1915, baxo l’advocación de Santa Olaya. Allúgase nun cuetu, Abamia, dende’l que s’avisten dellos pueblos de la parroquia. Ta a un kilometru penriba de Corao, na fastera sureste d’El Güeña, na oriella manzorga. Tien un texu vieyísimu nel llau oeste y el cementeriu ta pal llau este. Diz la tradición que nél tevo enterráu el Rei Pelayo enantes de que lu treslladaren a ilesia mesma, onde tovía s’alcuentra’l sepulcru con una espada malamente trabayada na tapa. Y dempués lleváronlu pa Cuadonga. Nesta ilesia ta enterráu agora, D. Roberto Frassinelli, conocíu pol llamatu de “L’ Alemán de Corao" y que foi treslladáu tamién dende El Cimenteriu d’Abamia a l’ilesia mesma. Ye de les ilesies más antigues del país y l’arcu de la puerta principal tien relieves, con delles figures de calter precristianu. Delles estrémense malpenes pola erosión de la piedra. Nesti llugar hebo tamién dos dólmenes agora desapaecíos. Nel so aniciu foi un edificiu amestáu ente manasteriu y fortaleza. Una informante diz que tenía sintío cuntar a los sos antepasaos que l’ hestoria darréu asocedió n’Abamia: “Yera conocía como la verdadera hestoria del Rei D. Rodrigo, que quixo quita-y la novia, Florinda, h.illa del Conde D.Julilán, a D. Pelayo. El Conde D. Julián, viudu, yera amigu d’una muyer que-y llamaben La Penitente, y que vivía nuna cueva. Tevo con ella un h.illu que-y salió médicu. Y D.Rodrigo llévolu a la corte. El casu ye que va el Rei D. Rodrigo y díxo-y qu’a ver si elli-y trayía a Florinda pa la corte, que prestaría-y muncho. Asina qu’el médicu llevó-y la, pero a la h.uercia. D. Rodrigo forzóla y sacóla p’alantre. Entós, el pá de Florinda, el Conde D. Julián, púnxose mui disgustáu y quería matar al Rei D. Rodrigo. En llegando el tiempu, ella tevo’l críu y llamó-y Chivarvinto. Ella, al vése asina, col críu, aburrióse de la vida y viénose p’Abamia a metese monxa. Y cuando taba entamando a cortar les coletes, llegó Pelayo galopando a caballu, a pidila en matrimoniu, pa que nun se metiera manxa, pos queríala lo mesmo col críu y tou. Pero Florinda díxo-y que non, que se casara con Gaudiosa, qu’al paecer yera prima hermana d’ella, o que teníense criáo xuntes. Y asina cuntaba la xente d’enantes, que n’Abamia tevo pesllada Florinda, que Pelayo casóse nesta mesma ilesia con Gaudiosa y qu’ ellí morrió tamién, onde dempués lu enterraron cola so muyer”. Anque iguóse delles vegaes ta abondo desdexada y mal aviada. Sícasi, faense n’ella dalgunos conciertos musicales y fechos culturales, dende nun va muncho.
Ilesia de Nuestra Señora de l’Asunción, La: Falando llámen-y tamién, “La Ilelesia Nueva de Corao” porque se fízo en 1915 pa baxar la parroquia d’Abamía, que taba lloñe de toos los pueblos, a Corao, pa que asina la xente alcontrara más afayadizu y cercanu ‘l llugar de cultu. Tien pórtcu nel llau sur y campanariu. Allúgase nel barriu Los Campos, nes cercanies de la desapaecida Capilla de San Nicolás. El retablu y los santos son los que taben en La Capilla de la Visitación d’ El Palaciu de Teleña.

Intriagu: Ye’l últimu pueblu de la parroquia. Ta allugáu a l’este, rayando cola parroquia de Mestes de Con. Llenda con la parroquia de Grazanes al norte, con Teleña y Priena al sur, y con La Estrada al oeste. Tien a Panes y d’El Güeña. Delles eríes tán tamién nes orielles d’El Regueru Umandi. Ésti entemézse con El Güeña al entamu’l pueblu, n’El Puente Intriagu que ye la entrada natural al pueblu.

Isongu: Pueblu de la parroquia asitiáu na fastera suroeste d’Abamia. Llenda al sur con Sotu Cangues y la parroquia de La Riera, al este con Corigos y al norte con Corao. Ta nun coteru arrimáu a La Peñe Isongu. Allúgase ente los colces d’El Deva al sur, El Güeña al norte y el de L’Agüañaz al este. La entrada al pueblu entama a la drecha de la carretera Cangues d’Onís a Panes, un pocu enates d’El Puente Tornamila. El tarrén ye mui rigüeto, con eríes altes, colladinos, llombes y cuetos a viesca. El camín antigu del pueblu yera L’Aspra, que xubía dende Combes, na parroquia de La Riera

Lavandera: Sitiu en La Vega d’Intriagu.

Lerón, El: Prau chicu a pastu, na ería Santu Mederu. N’Isongu.

Llagu l’Arbeyu, El: Llagu fechu pola riega que fai La H.uente L’Arbeyu, nel prau L’Arbeyu. N’Isongu.

Llagüezos: Prau na ería Llendespina. N’Isongu.

Llama. La: Sitiu na ería Santu Mederu. N’Isongu.

Llamarga, La: Finca en Coraín.

Llambréu, El: Ería con peazos a llabor, nel barriu San Nicolás. Llenda colo que foi la casa taller de la reloxería de Basilio Sobrecueva. Nesta ería antaño hebo un peñascu. En Corao.

Llambriago: Cuetu arboláu qu’arrodia la cueva y la fonte del mesmu nome. En Corao Castiellu.

Llamianes: Tarrén na ería Aroces. En Coraín.

Llana de Miyar, La: Tarrén en La Cueste La Granda, llenda al sur con camín. En Corao.

Llana Xerra, La: Llugar p’allá de Les Mengues, na ería Llendespina. N’Isongu.

Llana, La: Castañéu zarráu sobre sí, tirando a pindiu. En Corao Castiellu.

Llandrina: Castañéu. N’ Isongu.

Llaneces: Llanada con campera. Enllamárgase col mal tiempu. En La Cueste Perlleces.

Llanín de Tornamila: Sólu s’alcuéntra’l topónimu. Llugar desapaecíu cola igua la carretera Cangues d’Onís a Panes. Taba dempués d’El Puente Tornamila. En Corao.

Llanón de los Pandales: Praos a drecha y manzorga de la carretera que xube pa Teleña.

Llanos de Sierra, Los: Sitiu na ería Llendespina. N’Isongu.

Llanu, El: Prau a pastu ente llanu y pindiu. En Perlleces.

Llastres, Les: Tarrén bravío y pedregaloso pa escontra La Estrada. Ta nes cercanies d’El Güeña, onde s’ entemecen toes les riegues que baxen per esi sen de Cuetu Abamia y de Cuetu Aleos. N’Abamia.

Llavayu, El: Prau a pastu fresco y cuadres pal ganáu, n’Omedina. Isongu.

Llavera, La: Práu zarráu que llenda al sur con un tarrén llamáu Sulascuevas. En Coraín

Llaviada, La: 1. Finca onde atoña mui bien el verde, en Celoriu. 2. Praos nomaos asina en xeneral, que se dexen pa pación dempués de cortar el maíz, na ería de Santu Mederu y n’Omedina. En Isongu.

Llaviu, El: Prau onde atoña mui bona pación, na ería Sulavilla. En Corao Castiellu.

Lledín, El: Dos güertes a prau. En Celoriu.

Llendespina: Erial pergrande de finques a bona siega y a pación. Hai h.aces bien echaes, otres pindies y daqué tarrén con vayelles. Allúgase nun coteru rayando con Sotu Cangues pel oeste. Entama nel barriu Cimavilla, y allárgase hasta penriba Campu la Vara. Tien ramales pa les finques, agora iguaos en pistes pola concentración parcelaria. N’Isongu.

Llerís: Ería de praos arrimaos. Ta penriba La Torre La Xura per onde se creye que tenía de dir el camín soterrañu pa La Ilesia d’Abamia. Raya cola ería Llendespina d’Isongu. Tien riega de mal tiempu que naz pente llábanes nel prau La Peruyal. En Sotu Cangues.

Llinar, El: Viesca a castañares, ablanos y carbayos. En Cuetu Aleos.

Llinar, La: 1. Prau en Perlleces. 2. Nome que-y dan tamíen a la pista Cincuerna. En Teleña.

Llinariegues: Sitiu en La Vega d’Intriagu.

Llindagüeres: Caseríu nes cercanies de la pista a Cincuerna. Ta nun llugar separtáu penriba de Teleña, xusto penriba La H.uente Rialbor.

Llingrera, La: Dos praos cuestos a maíz, zarráos sobre sí. Tán rayando con La H.uente Llambriago. En Corao Castiellu.

Llomba, La: Campera y viescu allombáu. En Perlleces.

Llondrón, El: Prau bravíu con arboláu. En Cuetu Aleos.

Llongar, La: 1. Monte rigüetu y allargáu con ablanos, dalgún carbayu y daqué castañar. Allárgase dende penriba El Valle al barriu Cimavilla. N’Isongu. 2. Sitiu en Perlleces que ta tres del pueblu.

Llosa Campu, La: Prau zarráu sobre sí con daqué arboláu. En Cuetu Aleos.

Llosa Cau, La: Prau a pastu. Ta en La Ería de Celoriu, pa escontra El Güeña. Celoriu.

Llosa d’Alvira: Prau nel sitiu de Les Lloses. En Perlleces.

Llosa del Castañéu, La: Prau en La Cueste La Granda, llenda al oeste con camín. En Corao.

Llosa del Colláu, La: Prau cuestu con pumares, nel barriu d’El Colláu. En Teleña.
Llosa del Ortal, La: Na ería Santu Mederu. N’Isongu.

Llosa la Cueste la Granda, La: Llosa nel llugar del mesmu nome. En Corao.

Llosa Manuela: Prau nel sitiu de Les Lloses. En Perlleces.

Llosa Pepa, La: Prau nel llugar de Les Lloses. Perlleces.

Llosa, La: 1. Práu en Coraín. 2. Pradín arrimáu a la lladera de La Cueste Torió. En Sotu Cangues. 3. Prau pindiu nel barriu San Andrés. En Sotu Cangues.

Llosa’l Cura, La: Invernal con tarrén de llabor, cabaña y vivienda, onde diz que vivió un cura. En Teleña.

Llosa’l Gallegu, La: Prau a pastu nel sitiu Les Lloses. Perlleces.

Llosarada, La: Finca a prau, onde ta la fonte del mesmu nome. En Perlleces.

Lloses, Les: Praos conocíos, polo xeneral, col nome de los amos, y que tán asitiaos nes orielles d’El Caleyón del Rozu. En Perlleces.

Llosín de les H.uentines, El: Finca a prau nel sitiu del mesmu nome. En Corao.

Llosina del Vao de Llambréu, La: Pradín nel sitiu del mesmu nome. En Corao.

Llosona, La: Cuetu arboláu onde ta La H.uente’l Gorgoritu y que ta apegáu a La Grandera. En Sotu Cangues.

Llosu, El: 1. Prau que ta a l’entamu de Celoriu, nes orielles d’ El Camín p’Abamia. 2. Sitiu en El Vao de Les H.uentines. En Corao.

Lluengues, Les: Sitiu na ería Santu Mederu. Enantes había h.aces a maíz, allargaes y que finaben faciendo curves. N’Isongu.

Malata, La: Prau con cuadra y vivienda separtáu del pueblu. Ta asitiáu na oriella drecha del camín vieyu que diba pa Llabra. En Corao.

Malasalgar: Prau altu n’Omedina. Isongu.

Mansu, El. Prau llargu na oriella manzorga d’El Güeña. Allárgase dende El Puente Abamia a El Molín de Corao.

Marillabra: Casa, cuadra y praos. En Cuetu Aleos.

Martiniega, La: Barriu con viviendes y güertes, en La Ería de Celoriu.

Mata Ñavaríu, La: Viesca a matoxu y con daqué arboláu. Ta apegáu al prau Ñavaríu no cabero de la ería Llendespina. N’Isongu.

Mata, La: 1. Finca a pastu. En Perlleces. 2. Prau xunto a La Viesca del Roxín. En Celoriu.

Mayada, La: Sitiu y finca, en La Cueste la Granda. Llenda al oeste con La Teyera. Ta nes cercanies d’El Cimenteriu de Corao.

Mayorazu, El: Peazu a llabor nel sitiu de La Carrera, en La Vega H.ondos. En Corao.

Mediana, La: Prau en La Vega d’Intriagu.

Melandreres, Les: 1.Castañéu comunal d’Intriagu. 2. Llugar de cueves y de tarrén enllamargáo onde diz qu’añeraben los melandros. En Sotu Cangues.

Mengues, les: Prau a siega y h.aza, na ería Santu Mederu. N’Isongu.

Metía, La: 1.Prau llanu onde hai un horru que yera posesión d’El Palaciu de Corao. Llenda cola ería La Viña. Ta na cruz de la carretera Cangues d’Onís a Panes y a la drecha del ramal de la carretera que va pa Llabra. 2. Tarrén con praos que ta rayando pel norte cola parroquia de Llabra. En Perlleces. 3. Prau llanu na oriella drecha de la carretera de Cuadonga, nel barriu d’El Bosque. En Sotu Cangues.

Miraniegu: Viescu en Perlleces.

Miriacal, El: Barriu nun altucu. En Perlleces

Molín de Celoriu, El: Molín a granu na oriella manzorga d’El Güeña. En Celoriu.

Molín de Corao, El: Molín con casería a orielles d’El Güeña y qu’entovía muel güei. En Corao.

Molín de Mariña, El: Molín a granu con casa, agora abandonáu. Ta pel camín antiguu que diba de Corao Castiellu a Coraín.

Molín de Mundo, El: Molín mui vieyu que yá nun muel. Ta asitiáu n’El Prau Molín y tien canaliega pa coyer l’agua. En Corao.

Molín de Perico, El: Molín antiguu que fundió. Ta metanes el prau del mesmu nome, nes orielles d’El Regueru Umandi. N’ Intriagu.

Molín del Partidor, El: Molín qu’entovía muel güei. Ta asitiáu nes orielles d’El Deva, nel barriu d’El Bosque, en Sotu Cangues. Enriba’l molín ficieron agora un hotel col mesmu nome.

Monte Otura, El: Castañéu con arboláu d’alisu y carbayu, al pie del barriu H.ondevilla. Ta a la manzorga de la carretera que xube pa Teleña, apegáu a La Ería d’Abaxu. Teleña.

Mora: Erial de praos pindios. Allargáse pela fastera este de Teleña hasta La Ería Coru, yá n’Intrriagu. En Teleña.

Morezu, El: 1. Camín pedregalosu y antiguuu, que va a enllazar en La Cruz con La Caleya Rales. En Teleña. 2. Prau y cuetu onde enantes había viviendes y un horru. En Teleña.

Mortuoria, La: Prau llargu y llanu, en La Ería d’Abaxu de Parolu.

Muriécanu, El: Finca patente. Ta tarazada a la metá pola carretera de Cangues d’Onís aPanes, dexando los praos a drecha y manzorga d’ella. Asitáse nel barriu La Venta. En Sotu Cangues.

Novena, La: Sitiu en La Vega H.ondos. Corao.

Ñavariegu, El: 1.Tarrén en La Vega d’Intriagu. 2.Tarrén en La Vega H.ondos, en Corao.

Ñozal, El: Sitiu en La Vega de H.ondos. Corao.

Ñabaríu: Prau bonu y llanu con daqué recuestu, averáu a La Mata Ñavaríu. Isongu.

Ñoval: Prau a siega en La Ería d’Abaxu de Perlleces.
Ñozalones, Los: Invernal xunto a El Colláu Pandal, nes lladeres de Priena. Teleña.

Omedina: Ería asitiada no cimero d’un cuetu, na so fastera sur, a la vera de La Peñe Isongu. Ye persoleyera, con camperes a herba seco, a pastu y delles con pumares. El tarrén tien praos bien echaos, dellos con valleyes, y d’otros pindios. Ye un oteru dende onde s’avísten perbien Corao, Abamia, Corigos, Perlleces, Sobrecueva, Parolu, Coraín, Caro Castiellu. Llenda al este con La Peñe Isongu, y al sur col cuetu Cambarosu. N’Isongu.

Ordiales: Prau a herba, bien tiráu14 y con daqué xerru. Ta asitiáu dempués d’El Robleu, debaxo La Ilesia d’Abamia.

Orientes: Monte comunal a berezu y árgomal con invernales. Ta asitiáu na lladera de Priena. En Teleña.

Otu, L’: Castañéu penriba Los Pandales. N’Intriagu.

Otura: Monte con arboláu de castañares, umeros y carbayos. Asitiáu na manzorga de la carretera que xube pa Teleña.

Palaciana, La: Castañéu penriba’l barriu La Cortina, na ería d’El Pandal. En Coraín.

Palación del Prau Santa Rosa, El: Palaciu agora desfechu y desapaecíu. Taba allugáu n’El Prau Santa Rosa, onde tamién taba La Capilla Santa Rosa. En Corao.

Palaciu Cambre: Palaciu asitiáu nel barriu col mesmu nome. Foi mui refechu col tiempu. P’atrás tien restos d’un antigu torrexón con daqué ventanu medieval. Nel mesmu llau tien l’escudu del apellíu Soto, que foron los antiguos amos. Tenía tamién La Capilla de la Encarnación, desfecha nun va munchu. En Sotu Cangues.

Palaciu de los Noriega: Casón de señoríu con dellos edificios apegaos. En Corao. Ye de fechura cenciella, con entrellizáu de madera y bones llábanes nos corneyales. Ddalantre tien tres plantes, con estragal, corredor y galería. P’atrás, ta’l llau más antigu, del sieglu XVI. Allugáse nuna güerta patente y zarrada sobre sí con muria de piedra. Na corrada hai pozu d’agua, tamién de piedra. Cunta una informante que “un indianu, amu d’esti palaciu, traxo d’América un bustu momificáu d’una rapaza india cola que tuviera amores y que morrió moza allá”.

Palaciu de Parolu, El: Palaciu allugáu nuna bona güerta, mui soleyera, con frutales, ablanos, y una figar pervieya. El tarrén ye daqué arrimáu al tar Parolu nun cuetu. Tien un corredor bonu sofitáu con colunes y que fai de sotechu a un estragal anchu con bones llábanes pel suelu. Hai tamién una bona panera. Les cuadres y La Capilla de la Soledá tán tres d’El Palaciu. Dende la güerta avístase perbien Igüedu y la ería de La Rotella. Parolu.

Palaciu de Teleña, El: Agora yá nun tien traza de palaciu porque ta iguáu de delles viviendes. Nél taben los escudos coles armes del apellíu Teleña, pero los amos baxáronlos pala so casa de Corao. Anque entovía, pue vese una llábana con una inscripción del sieglu XVIII, xusto al pie de la vivienda que ta a la manzorga. El llau d’atrás fundió, ta en ruines y vénse malamente delles pintures polos murios. Cunta un informante: “Tamién tien fundise los suétanos, onde apaecieron restos de cadarmes de xente como si tuvieran emparedaos, o pue que fueran delles sepultures antigues. Fálase tamién de qu’al morrer un amu d’esti palaciu teníalu mandáu a una rapaza que taba de sirvienta pa elli. Y de sutrucu, la rapaza desapaició y enxamás súpose d’ella”.

Palanques, Les: H.acines a llabor en La Vega H.ondos. Corao.

Pallambosu: Prau con arbolíu n’Omedina. Isongu.

Panda d’Abaxu: Tarrén n’abertal con arboláu. En Cuetu Aleos.

Panda Robléu: Viescu en Perlleces.

Panda, La: Prau na ería Santu Mederu. Isongu.

Pandal, El: 1.Ería a siega, de tarrén ente patente y rigüetu con arboláu y que s’alléga hasta Sobrecueva. En Coraín. 2. Viesca en La Ería del Pandal. En Sobrecueva.

Pandales Les: 1. Pradón llanu, averáu a La Capilla de Santu Mederu, na ería del mesmu nome. Isongu. 2. Finca a pastu, de tarrén ente llanu y cuestu con cuadra. N’Intriagu.

Pandalina, La: Finca na ería Santu Mederu. N’Isongu.

Pandellón, El: Sitiu na ería d’Aleos. Llendaba al saliente con finca d’el que fora cura d’Abamía. Cuetu-Aleos.

Panderrobléu: Monte a viesca n’EL Colláu del Pandal y que llenda con Sobrecueva. Coraín.

Pandiella, La: Viesca con riega del mesmu nome que baxa cruciándola. N’Intriagu

Pandisiertos: Erial con cuadres desfeches y tres cases. Dalguna ta iguada agora pa vacaciones. Ta asitiáu nun altu penriba La Estrada, nel camín a Pedrugada. Tien pista iguada que sal a El Puente Itriagu. Antañu vivió ellí un tarreñeru.

Paraes: Prau a pastu con tarrén llano y dello recuesto. Hai un camín peonil de pasu a La Peñe Isongu. Isongu.

Paredilles, Les: Barriu de Sotu Cangues.

Parolu, (~ Paroru): Pueblín d’Abamia con siete viviendes, delles vacies. Agora sólu hai dos habitantes. Asítiase na fastera noroeste de la parroquia, na fastera drecha d’El Ríu Chicu, nes lladeres de La Cueste Parolu. Raya al oeste con Sobrecueva.

Parrocha, La: H.aza en La Vega H.ondos, pa escontra Corao Castiellu. En Corao.

Pasada del Riegu, La: Sitiu en La Vega H.ondos. Corao.

Pasada, La: Viesca allúgada nes orielles de la carretera que xube a Isongu.

Pasáu’l Ríu: Sitiu en la Vega H.ondos. Corao.

Pasera, La: 1. Finca no cabero de La Vega H.ondos. Corao. 2. Viesca que ta a dambos llaos de Cuenyu a Santu Mederu. N’Isongu. 3. Sitiu en Sotu Cangues onde agora hai un hotel col mesmu nome. Enantes había cuadra, vivienda y horru.

Pasu a la Peñe: Camín con campera n’Omedina. Isongu.

Pebida d’Arriba, La: Castañéu y praos n’abertal, a la drecha d’El Camín Real a Teleña. En Cuetu Aleos.

Pedraces, Les: Tarrén n’abertal, y que ta amuñonao con arboláu vario. En Cuetu Aleos.

Pedrayos, Los: Sitiu en La Vega H.ondos. Corao.

Pedregosa, La: Prau a pastu con daqué xerru y matoxu. En Perlleces.

Pedreru, El: Camín pedregalosu con camperina que sal a El Morezu. Enllaza con La Caleya Rales y xube a La Cruz de Priena. En Teleña.

Pedrosos, Los. Sitiu en la Vega H.ondos, ta pa escontra Corao Castiellu. En Corao.

Pedrosu, El: H.aza en La Vega H.ondos. En Corao.

Pedrugada: Llugar de praos pindios onde hai una casería que llamen El Colláu. Ta asitiáu penriba la Estrada, a la manzorga d’esti pueblu.
Pelafonso: Prau que ta diendo per Omedina y baxando per El Caleyón del Ventaniellu. Isongu.

Peñapeñil: Barriu d’una vivienda y praos. Allúgase nun cuetu con una caleya del mesmu nome que baxa a La Estrada. Ellí semóse tabacu antañu. En Corao Castiellu.

Peñayos: Castañéu en Corao Castiellu.

Peñayu, El: 1.Viesca a castañares, carbayos y matoxu. Ta penriba Celoriu y allégase hasta La Cueste Perlleces. 2. Peñascal que llinda con El Tueru. Un informante cunta: “Cuado inventaron los aviones, un home tiróse dende lo cimero enfotáu en volar, armóse de h.elechos polos brazos y pegóse un buen sapiazu”. En Corao Castiellu.

Peñe Isongu, La: Nome xenérico col que la xente de la parroquia noma’l monte comunal que ta pal sureste d’Isongu. Ta rayando al sur con El Puertu de la Montaña de Cuadonga. Ye de tarrén peñasquero ,con invernales, viesques a matoxu y camperes a pastu. Tien munchos caminos peoniles y escobios pal pasu d’oveyes y vaques. Isongu.

Peñón de Supiedra, El: Un cuetu que ye llanu no cimero, y tien arboláu con daqué carbayu. Ta penriba Pedrugada.

Pepesantu, El: Prau asitiáu pembaxo la finca La Conquista. Ta amirando pal sen de La Ilesia de Corao. En Corao Castiellu.

Peral, El: Prau en Perlleces.

Peralina, La: Prau con pumares. En Perlleces.

Perlleces: Pueblu de la parroquia. Ta allugáu n’el valle arrequexáu que fai El Regueru d’Onao, el llinderu natural pel noroeste cola parroquia de Cangues d’Onís. Llégase per una carreterina qu’entama a la manzorga de la carretera Cangues d’Onís a Panes, un cachu enates de La Venta de Sotu Cangues. El pueblu ta asitiáu nun altu penriba de Celoriu y Sobrecueva colos que raya al sur y este, llendando al norte cola parroquia de Llabra.

Peruyal, La: Prau na ería Llerís onde había peruyos. En Sotu Cangues.

Pescar, La: Sitiu en La Vega d’Intriagu.

Picu la Rasa, El: Picu en La Peñe Isongu.

Piedrallacia: Barriu con dos viviendes mui antigues. Ta no caberu de Corao Castiellu, na so fastera este y asitiáu nun coteru pa escontra La Estrada.

Piedrona, La: Sitiu na ería La Viña onde había enantes un peñascu. En Corao.

Piniella, La: Invernales de monte comunal zárraos sobre sí. Tán pal llau del valle Umandi, a la vera de Priena. N’Intriagu.
Pipa, La: Prau onde ta la fonte del mesmu nome, y per el que cuerre una riega. En Perlleces.

Piperes, Les: Sitiu con prau y castañéu, ta xunto a La H.uente les Piperes. En Corao.

Pipón, El: Prau grande con pomares y cuetu arboláu. Hai un depósitu d’agua. N’El Bosque de Sotu Cangues.

Pista del Caleyín del Cuadrín, La: Camín antiguu agora iguáu de pista, pa dir a La Canal. En Teleña.

Pista, La: Nome xenérico que-y da la xente agora a les antigues caleyes, caleyines y caleyones, iguaos en pistes pola concentración parcelaria de la parroquia.

Playa Redonda: Castañéu llanu. Ta penriba Celoriu.

Playa, La: Castañéu llanu, en La Cueste La Granda. En Corao.

Pollones, Los: Castañéu a la vera El Güeña. Ta pa escontra Celoriu y hai un muriu que fízose dempués de la guerra. En Sotu Cangues.

Pontiga, La: Barriu de Sotu Cangues. Tien un pontín vieyu y de maera enriba El Güeña. Ta allugáu a la drecha del barriu Cambre.

Pontigu, El: Pontín enriba El Güeña, a la drecha d’El Castañéu. L’agua cuerre per una canaliega que va pa la presa d’El Molín de Corao. En Corao.

Porte Vega: Prau en Teleña.

Portiella, La: 1. Fonte bona n’El Güeña. Ta pa escontra El Puente d’El Roxín. En Celoriu. 2. H.aza en La Ería d’Arriba de Perlleces. 3. Sitiu a l’entamu La Vega H.ondos. En Corao. 4. Barriu d’una vivienda nel sitiu de H.ondevilla. En Teleña.

Portiellona, La: Pradón a siega tirando a llanu en La Ería de Parolu. Ta asitiáu a l’entamu’l pueblu diendo dende Sobrecueva.

Portiellu del Molín, El (~ Tornamila): Prau a la manzorga de la carretera d’Isongu que llenda pol norte col sitiu de Tornamila. Ye de los amos d’ El Molín de Corao. Conozse tamién como Tornamila.

Portiellu del Soyón: Llugar con camín, castañéu y praos. N’Isongu.
Portiellu del Tocéu, El: Sitiu y camperina onde entamen los praos d’El Tocéu. Ta a la manzorga del camín que xube a Omedina y periba de La Cueste. N’Isongu.

Portiellu, El: 1. Barriu no cabero de Perlleces. Antaño yera la entrada natural del pueblu y xubía per El Carrilón dende Celoriu. 2. Sitiu na ería San Nicolás. En Corao.

Portillería, La: Sitiu en La Vega H.ondos. En Corao.

Potral, El: Prau y h.aces con una casa cuadra. En Perlleces.

Pozabal: Invernal a la manzorga d’El Berezal. N’Isongu.

Pozalán: Llugar onde s’arrexunten El Cepéu d’Abaxu y La Caleya La Viña. Ellí va a dar la riega del desagüe del pueblu. En Teleña.

Pozu Abamia, El: Prau de doce díes de gües n’Abamia. Llenda al norte colo que yera La Retoral d’Abamia y al sur con sebe y praos del Cuetu Abamia.

Pozu l’Estancu, El: Ta allugáu no caberu’l pueblu de Corao, n’El Güeña. Ta nes cercanies d’El Vao les H.uentines y pa escontra La Estrada, asitiáu un cachu penriba de la presa que recueye l’agua pal usu d’El Molín de Corao.

Pozu l a Esguitera, El: Pozu n’El Güeña que ta cara a El Molín de Corao. En Corao.

Pozu la Teyera, El: 1.Pozu n’El Güeña que ta cara a La Teyera o sitiu de la La Comicosa. En Sotu Cangues. 2. Pozu nuna curva que fai El Güeña nes cercanies d’El Puente Abamia. En Corao.

Pozu los Corvinos, El : H.aza a prau tapín con agua que surde del suelu. Ta na ería Santu Mederu, cara a Les H.errerines. N’Isongu.

Pozu, El: Prau a siega onde La Riega Cabielles. Ta asitiáu na llende oeste de la parroquia d’Abamia cola de Cangues d’Onís. En Sotu Cangues.

Pozu’l Gatu, El: Pozu xuncosu n’El Güeña. En Sotu Cangues.

Pradascu, El: Prau a pastu en La Erí